ज्याला विरोध तोच निवडून आला! ट्रम्प यांना झटका, भारतीय वंशाच्या मुस्लीम तरुणानं इतिहास घडवला, न्यूयॉर्कच्या महापौरपदी विजयी

या निवडणुकीच्या निकालाने अमेरिकेचे राष्ट्राध्यक्ष डोनाल्ड ट्रम्प यांना मोठा धक्का बसला. कारण ट्रम्प यांची इच्छा ममदानी विजयी होऊ नये अशी होती, आता ट्रम्प यांच्या आशांवर पाणी फिरलं. ममदानी यांनी डोनाल्ड ट्रम्प यांच्या नाकावर टिचून ही निवडणूक जिंकवून दाखवली. ट्रम्प यांच्या धमक्यांना भीक न घालता ममदानी यांना मोठ्या मताधिक्याने विजय मिळवून दिला. जोहरान ममदानी यांच्या या विजयामुळे अनेक विक्रम एकाचवेळी रचले.

ममदानी हे केवळ ३४ वर्षांचे आहेत आणि ते न्यूयॉर्क सिटीचे गेल्या १०० वर्षांतील सर्वात तरुण महापौर ठरले. याशिवाय, ममदानी हे न्यूयॉर्कचे महापौर बनणारे पहिले भारतीय वंशाचे मुस्लीम आहेत. निवडणुकीपूर्वी झालेल्या सर्वेक्षणांमध्येही ममदानी महापौरपदासाठी सर्वात आवडते उमेदवार म्हणून समोर आले होते आणि त्यांनी अपेक्षेनुसार ही निवडणूक जिंकली. ममदानी यांची पार्श्वभूमी अत्यंत रंजक आहे. ते प्रसिद्ध चित्रपट निर्मात्या मीरा नायर यांचे सुपुत्र आहेत आणि राजकारणात येण्यापूर्वी ते स्वतः एक रॅपर म्हणून ओळखले जात होते. त्यांचा जन्म युगांडाची राजधानी कंपाला येथे झाला होता, पण वयाच्या अवघ्या सातव्या वर्षी ते न्यूयॉर्कला आले आणि इथले नागरिक बनले.

न्यूयॉर्कच्या महापौरपदाच्या या निवडणुकीत ममदानी यांचा सामना दोन प्रमुख उमेदवारांशी होता. न्यूयॉर्कचे माजी गव्हर्नर असलेले अँड्र्यू कुओमो हे अपक्ष उमेदवार म्हणून उभे होते, तर रिपब्लिकन पक्षाकडून कर्टिस स्लिवा यांना उमेदवारी देण्यात आली होती. निवडणुकीच्या सर्वेक्षणांमध्ये कुओमो आणि स्लिवा हे दोघेही ममदानी यांच्या तुलनेत मागे होते आणि निवडणुकीच्या निकालांनीही त्यांना निराशाच हाती लागली.

डोनाल्ड ट्रम्प यांनी ममदानी यांच्या विजयाला विरोध दर्शवला होता. या निवडणुकीच्या निकालामुळे ट्रम्प यांच्या विचारधारेला मोठा धक्का बसल्याचे मानलं जात आहे. न्यूयॉर्कसारख्या महत्त्वाच्या शहरात अल्पसंख्याक वंशाच्या आणि तरुण उमेदवाराला मिळालेला हा विजय अमेरिकेतील राजकीय बदलाचा आणि विविधतेचा महत्त्वपूर्ण संदेश देणारा आहे. ममदानी यांचा विजय केवळ न्यूयॉर्कसाठीच नाही, तर अमेरिकेतील भारतीय वंशाच्या आणि मुस्लिम समुदायासाठी एक महत्त्वपूर्ण यश मानला जात आहे.