कृषी हवामान :आज पुन्हा आभाळ फाटणार! पीकं भुईसपाट, IMD कडून या जिल्ह्यांना रेड अलर्ट जाहीर

दरम्यान, जळगावच्या चाळीसगाव तालुक्यात मुसळधार पावसामुळे डोंगरी व तितुर नदीला पूर आला आहे. त्यामुळे नदीकाठच्या नागरिकांना सुरक्षित स्थळी हलवण्यात आले आहे. काढणीवर आलेल्या पिकांचे मोठे नुकसान झाले आहे. धाराशिव जिल्ह्यात तेरणा नदीला पूर आल्याने प्रशासनाने सावधगिरी बाळगण्याचा इशारा दिला आहे. पुणे जिल्ह्याला यलो अलर्ट असून घाटमाथ्यावर ऑरेंज अलर्ट जारी करण्यात आला आहे. खडकवासला धरणातून मुठा नदीत विसर्ग सुरू असून, नाशिकमधील गंगापूर धरणातून गोदावरी नदीपात्रात पाणी सोडण्यात आले आहे. त्यामुळे गोदावरी नदीला पुन्हा पूर आला आहे आणि नदीकाठच्या लोकांना सतर्कतेचा इशारा देण्यात आला आहे.

जायकवाडी, उजनी, कोयना, गंगापूर, बिंदुसरा, येलदरी, गोसेखुर्द, बेंबळा, धामणी, निम्नदुधना, खडकवासला व भातसा यांसारख्या महत्त्वाच्या धरणांचे दरवाजे उघडले आहेत. गोदावरी आणि सीना नद्यांनी धोक्याची पातळी ओलांडली असून, पाणीपातळी वाढल्याने नदीकाठची गावे धोक्यात आहेत.

मुख्यमंत्री देवेंद्र फडणवीस यांनी मराठवाड्यातील जिल्हाधिकाऱ्यांशी संवाद साधून आपत्ती व्यवस्थापनासाठी सर्व अधिकारी प्रत्यक्ष फिल्डवर राहून काम करण्याचे आदेश दिले आहेत.

सोयाबीन पिकावर पानांवर डाग पडल्यास कार्बेन्डाझिम किंवा मॅन्कोझेब मिश्रणाची फवारणी करावी. गळ येऊ नये म्हणून ट्रायकोडर्मा अथवा योग्य बुरशीनाशकाचा वापर करणे आवश्यक आहे.