शेतकऱ्यांसाठी महत्त्वाची बातमी! यंदा मान्सून चांगला, पण रब्बी हंगामाला किती फायदा?

पुणे : खरीप संपून नुकताच रब्बी हंगाम सुरु झाला आहे. गहू, बार्ली, मोहरी, हरभरा, मसूर, तीळ, ओट ही हंगामातील प्रमुख पिके आहेत. यंदाच्या वर्षी मान्सून पाऊस लांबला. अगदी दिवाळीतही परतीच्या मान्सूनने हजेरी लावली. त्याचा शेतीवरही परिणाम झाला. आता या पावसाचा रब्बी पिकांना फायदा होणार का? याबाबत पुणे येथील पुणे येथील हवामान शास्त्रज्ञ जालिंदर साबळे यांनी माहिती दिलीये.

महाराष्ट्र राज्यामध्ये मान्सूनचा पाऊस जून ते सप्टेंबर राहिला. या काळात सरासरीच्या जवळपास 121 टक्के पाऊस झाला. सप्टेंबर महिन्याचा विचार केला तर 125 टक्के पाऊस या महिन्यात झाला. त्याचप्रमाणे दिवाळीपर्यंत परतीच्या पावसाने हजेरी लावली. त्याचा शेतीला चांगला फायदा झाला. राज्यातील परतीच्या पावसाला 5 ऑक्टोबरला सुरुवात होते. नंदुरबार, धुळे भागातून सुरु होऊन 12 ते 13 ऑक्टोबरला तो संपूर्ण महाराष्ट्रातून जातो. परंतु यंदाच्या वर्षी हा पाऊस 10 दिवस लांबला आहे.

करडई : 15 सप्टेंबर ते 15 ऑक्टोबर

हरभरा : जिरायती 15 सप्टेंबर नंतर,

हरभरा : बागायती 20 ऑक्टोबर ते 10 नोव्हेंबर

मक्का 15 ऑक्टोबर ते 10 नोव्हेंबर

सूर्यफूल : ऑक्टोबर पहिला पंधरवडा ते नोव्हेंबर पहिला पंधरवडा

गहू : जिरायती 1 ते 10 नोव्हेंबर,

गहू : बागायती 1 नोव्हेंबर ते डिसेंबर पहिला पंधरवडा.

राज्यातील रब्बी हंगाम बघितला तर पाऊस लांबल्यामुळे पेरणीला सुरुवात झाली नाही. कोकणातील रब्बीचे क्षेत्र हे 0 टक्के असून 2 टक्के पेरण्या झाल्या आहेत. तर पुणे विभागात 34 टक्के पेरण्या झाल्या आहेत. कोल्हापूर मध्ये 29 टक्के तर एकूण राज्यामध्ये रब्बीच्या पिकांच्या 11 टक्के पेरण्या पूर्ण झाल्या आहेत. राज्यामध्ये यंदा रब्बीला अनुकूल वातावरण असून लांबलेला पाऊस पिकांसाठी फायदेशीर ठरत आहे, अशी माहिती हवामान शास्त्रज्ञ साबळे यांनी दिली आहे.