Krushi Market : सोयाबीनच्या दरात तेजी तर कापूस स्थिर,टोमॅटो कारल्याची स्थिती काय? वाचा आजचे बाजारभाव

सोयाबीनला चांगला भाव

देशांतर्गत बाजारात सोयाबीनच्या दरांना सध्या स्थैर्य मिळाले आहे. आवक मर्यादित असताना सोयातेल आणि सोयापेंडला चांगली मागणी असल्यामुळे दराला आधार मिळत आहे.सध्या सोयाबीनला प्रतिक्विंटल सुमारे ५,२०० ते ५,५०० रुपये दर मिळत आहे. जागतिक स्तरावर सुरू असलेल्या तणावामुळे खाद्यतेल आयात महागल्याने देशांतर्गत सोयातेलाचे दरही वाढले आहेत. त्यामुळे येत्या काही दिवसांत सोयाबीनचे भाव स्थिर राहण्याचा अंदाज बाजार अभ्यासकांनी व्यक्त केला आहे.

advertisement

कापूस दर स्थिर

कापसाच्या बाजारातही गेल्या काही दिवसांपासून स्थिरता दिसून येत आहे. देशांतर्गत आणि निर्यातीची मागणी चांगली असल्यामुळे कापसाला उठाव मिळत आहे. सध्या कापसाला प्रतिक्विंटल ७,२०० ते ७,९०० रुपये दर मिळत आहे. याशिवाय, कॉटन कॉर्पोरेशन ऑफ इंडिया (CCI) नेही विक्री दर स्थिर ठेवल्यामुळे पुढील काळात कापसाचे भाव स्थिर राहण्याची शक्यता वर्तवली जात आहे.

कारल्याच्या दरावर आवकेचा परिणाम

राज्यातील बाजारात कारल्याची आवक वाढल्याने दरावर काहीसा दबाव दिसून येत आहे. सध्या कारल्याला २,५०० ते ४,००० रुपये प्रतिक्विंटल दर मिळत आहे. मागणी चांगली असली तरी वाढलेल्या आवकेमुळे दरात चढ-उतार होत आहेत. काही भागांत वाढती उष्णता आणि पाणीटंचाईमुळे नव्या लागवडीवर परिणाम होत असल्याचे शेतकरी सांगत आहेत. मात्र मागणी टिकून असल्याने पुढील काळात दराला काही प्रमाणात आधार मिळू शकतो.

गवार तेजीत कायम

गवारच्या बाजारात मात्र तेजी कायम आहे. कमी आवक आणि घटलेली लागवड यामुळे गवारला चांगला दर मिळत आहे. सध्या गवारला प्रतिक्विंटल ५,००० ते ७,००० रुपये दर मिळत आहे. पुढील काळातही आवक मर्यादित राहण्याची शक्यता असल्याने गवारचे भाव टिकून राहण्याचा अंदाज व्यापाऱ्यांनी व्यक्त केला आहे.

टोमॅटो दर दबावात

टोमॅटोच्या बाजारात सध्या दबावाचे वातावरण आहे. विविध भागांत उत्पादन वाढल्याने बाजारात आवक मोठ्या प्रमाणावर झाली आहे. त्यामुळे टोमॅटोला सध्या प्रतिक्विंटल ८०० ते १,२०० रुपये दर मिळत आहे. येत्या काही दिवसांतही आवक चांगली राहण्याची शक्यता असल्याने दरावर दबाव कायम राहू शकतो, असे जाणकारांचे मत आहे.