फॉरेनला जाऊन शिक्षण घेतलं, MNC कंपनीतील नोकरी सोडली, कबीर आता या शेतीतून करतोय करोडोंची कमाई

मुंबई : स्वप्न पाहण्याची हिंमत आणि त्या स्वप्नांना सत्यात उतरवण्यासाठी जिद्द असेल, तर मातीसुद्धा सोनं पिकवते, याचं जिवंत उदाहरण म्हणजे छत्तीसगडच्या रायपूरमधील कबीर चंद्राकर. उच्च शिक्षण, परदेशी संधी आणि कॉर्पोरेट करिअरचे आकर्षण बाजूला ठेवून त्यांनी शेतीचा मार्ग निवडला आणि आज ते केवळ स्वतःच यशस्वी उद्योजक झाले नाहीत, तर इतर शेतकऱ्यांसाठीही प्रेरणास्थान ठरले आहेत. केंद्र सरकारच्या योजनांचा योग्य वापर करून त्यांनी आधुनिक शेतीचा आदर्श निर्माण केला आहे.

advertisement

परदेशात शिक्षण घेतलं

कबीर चंद्राकर यांनी परदेशात उच्च शिक्षण घेतले आहे. शिक्षण पूर्ण केल्यानंतर त्यांच्यासमोर मोठ्या बहुराष्ट्रीय कंपन्यांमध्ये नोकरीच्या संधी उपलब्ध होत्या. मात्र, त्यांनी सुरक्षित आणि आकर्षक वाटणारा कॉर्पोरेट मार्ग न निवडता शेतीकडे वळण्याचा धाडसी निर्णय घेतला. पारंपरिक शेतीऐवजी आधुनिक तंत्रज्ञान, नियोजन आणि बाजारपेठेचा अभ्यास करून त्यांनी फळबाग लागवडीचा व्यवसाय सुरू केला.

२०१४-१५ या कालावधीनंतर त्यांच्या शेती व्यवसायाला खऱ्या अर्थाने चालना मिळाली. केंद्र सरकारच्या राष्ट्रीय फलोत्पादन मंडळाकडून (एनएचबी) मिळालेल्या कर्ज आणि अनुदानाचा त्यांनी प्रभावीपणे वापर केला. सुरुवातीला अवघ्या सहा एकरांवर पेरूची लागवड सुरू केलेल्या चंद्राकर यांनी टप्प्याटप्प्याने आपला व्यवसाय विस्तारला. आज त्यांची पेरूची बाग ११५ ते १२० एकरांपर्यंत पोहोचली आहे.

११५ ते १२० एकर क्षेत्रावर लागवड

रायपूरचे रहिवासी असलेले कबीर चंद्राकर सध्या तब्बल ११५ ते १२० एकर क्षेत्रावर पेरूची लागवड करतात. त्यांच्या शेतात उत्पादित होणारे दर्जेदार पेरू केवळ देशांतर्गत बाजारातच नव्हे, तर परदेशातही निर्यात केले जातात. शेती म्हणजे केवळ उदरनिर्वाहाचे साधन नसून ती एक फायदेशीर उद्योग ठरू शकते, हे त्यांनी आपल्या कामातून सिद्ध केले आहे.

दरवर्षी कोट्यवधी रुपयांचा टर्नओव्हर

चंद्राकर सांगतात की, पेरूच्या लागवडीतून चौथ्या वर्षापासून चांगले उत्पन्न मिळू लागले. सध्या ते प्रति एकर अंदाजे पाच ते सहा लाख रुपयांचे वार्षिक उत्पन्न घेत आहेत. एकूण उत्पन्नाचा विचार करता, त्यांचा शेती व्यवसाय दरवर्षी कोट्यवधी रुपयांचा टर्नओव्हर निर्माण करतो. योग्य नियोजन, सातत्य आणि सरकारी योजनांचा लाभ घेतल्यास शेतीतही मोठे यश मिळवता येते, हे त्यांच्या अनुभवातून स्पष्ट होते.

मात्र, हा प्रवास सोपा नव्हता. सुरुवातीच्या काळात त्यांना पिकाच्या विक्रीसाठी अनेक अडचणींचा सामना करावा लागला. सुरुवातीला त्यांनी रायपूर परिसरातच पेरूची विक्री सुरू केली. हळूहळू त्यांनी ओडिशा, बिहार यांसारख्या राज्यांमध्ये आपला बाजार विस्तारला. आज त्यांच्या शेतातील पेरू दिल्ली आणि मुंबईसारख्या मोठ्या बाजारपेठांपर्यंत पोहोचतात.

व्यवहाराच्या सुरुवातीच्या टप्प्यात आर्थिक अडचणी आणि विश्वासाचा अभाव जाणवत होता. मात्र, व्यापाऱ्यांशी दीर्घकालीन आणि विश्वासार्ह संबंध निर्माण केल्यानंतर या समस्या दूर झाल्या. आज कबीर चंद्राकर यांची ओळख यशस्वी शेतकरी-उद्योजक म्हणून होत असून, त्यांची कथा तरुणांना शेतीकडे वळण्याची नवी प्रेरणा देत आहे.