यावर्षीची ‘ढिंचॅक दिवाळी’ प्रेक्षकांसाठी मनोरंजनाची मोठी मेजवानी घेऊन येत आहे, कारण यात महाराष्ट्रातील दोन लाडके विनोदवीर डॉ. निलेश साबळे आणि भाऊ कदम 'चला हवा येऊ द्या' नंतर पहिल्यांदाच एका वाहिनीवर एकत्र येत आहेत.
advertisement
निलेश साबळे आणि भाऊ कदम यांच्या जुगलबंदीसाठी प्रेक्षक खूप आतुरतेने वाट पाहत होते. अखेर, ही प्रतीक्षा आता संपणार आहे.
डॉ. निलेश साबळे म्हणाले, “आम्ही खूप दिवसांपासून प्रेक्षकांना हसवण्यासाठी तयारी करत होतो. दिवाळीच्या निमित्ताने आम्ही स्टार प्रवाह वाहिनीवर काहीतरी खास घेऊन येत आहोत. भाऊसोबत काम करताना नेहमीच मजा येते.”
ते पुढे म्हणाले, “मी भाऊला आणि भाऊ मला गेली १५ वर्षे ओळखतो. त्यामुळे आमचं टायमिंग खूप चांगलं जुळतं. भाऊ प्रत्येक भूमिकेत जीव ओततो, त्यामुळे तो नेहमीच लेखकाचा आवडता कलाकार राहिला आहे.”
भाऊ कदम म्हणाले, “मी पहिल्यांदाच स्टार प्रवाह वाहिनीसोबत काम करत आहे, त्यामुळे मी खूप उत्सुक आहे. यंदाची दिवाळी खरंच ‘ढिंचॅक’ असणार आहे, कारण आम्ही प्रेक्षकांना हास्याचा फराळ देणार आहोत.”
‘ढिंचॅक दिवाळी’ हा कार्यक्रम कॉमेडी, भावनिक क्षण आणि धमाल डान्सने भरलेला असेल. हा कार्यक्रम १२ ऑक्टोबरला संध्याकाळी ७ वाजता फक्त स्टार प्रवाह वाहिनीवर प्रसारित होईल.