1 ऑक्टोबरपासून बदलणार रेल्वे तिकीटाचे नियम, बुकिंग करण्याआधीच चेक करा नाहीतर होईल नुकसान

तात्काळ आणि जनरल तिकीट, बदललेले नियम समजून घ्या

सध्याच्या नियमांनुसार, तात्काळ तिकीट बुक करण्यासाठी तुमच्या IRCTC खात्याला आधारशी लिंक करणे अनिवार्य आहे. रेल्वे मंत्रालयाने 15 जुलै 2025 पासून याबाबतच्या सूचना जारी केल्या होत्या, आता IRCTC ॲप किंवा वेबसाइटवरून तिकीट बुक करताना तुमच्या आधार कार्डशी जोडलेल्या मोबाइल नंबरवर OTP (वन टाइम पासवर्ड) येईल. हा OTP टाकल्याशिवाय तिकीट बुकिंग होणार नाही. रेल्वेने हे पाऊल दलाल आणि बेकायदेशीर बुकिंग रोखण्यासाठी उचलले आहे, जेणेकरून सामान्य प्रवाशांना सणासुदीच्या गर्दीतही सहजपणे तिकीट मिळू शकेल.

या बदलांमुळे अनेक प्रवाशांच्या मनात प्रश्न निर्माण झाला आहे की, आता जनरल तिकिटांसाठीही आधार कार्ड लागेल का? जर तुम्ही IRCTC च्या वेबसाइट किंवा ॲपवरून जनरल रिझर्व्हेशन करणार असाल, तर तुमच्यासाठी १ ऑक्टोबरपासून नियम बदलत आहेत. आता ऑनलाइन जनरल तिकीट बुकिंगसाठीही ई-आधार पडताळणी आवश्यक असेल. रिझर्व्हेशन विंडो उघडल्याच्या पहिल्या १५ मिनिटांपर्यंत फक्त आधारशी जोडलेले वापरकर्तेच तिकीट बुक करू शकतील.

स्टेशन काउंटरवरील जनरल तिकीट: मात्र, जर तुम्ही स्टेशनवरील तिकीट खिडकीतून जनरल तिकीट खरेदी करणार असाल, तर काळजी करण्याची गरज नाही. तिथे तुम्हाला कोणत्याही ओळखपत्राची गरज नाही. तुम्ही पूर्वीप्रमाणेच सहजपणे तिकीट घेऊ शकता.

एजंट्ससाठीही नवीन नियम

या बदलांमध्ये आणखी एक मोठा फायदा सामान्य प्रवाशांना होणार आहे. आता तत्काळ तिकीट बुकिंग विंडो उघडल्याच्या पहिल्या 10 मिनिटांपर्यंत IRCTC एजंट तिकीट बुक करू शकणार नाहीत. या 10 मिनिटांत फक्त आधारशी जोडलेले वापरकर्तेच तिकीट बुक करू शकतील.

एसी क्लासचे तिकीट बुकिंग सकाळी 10:00 ते 10:30 या वेळेत फक्त प्रवाशांसाठी उपलब्ध असेल.

नॉन-एसी तिकिटांचे बुकिंग 11:00 ते 11:30 या वेळेत असेल.

हे नियम खास तुमच्यासाठी तयार केले गेले आहेत, जेणेकरून तुम्हाला तिकीट मिळण्याची शक्यता वाढेल.

तुमचे IRCTC खाते आधारशी असे लिंक करा

ऑनलाइन तिकीट बुक करण्यासाठी सर्वात आधी तुम्हाला तुमचे IRCTC खाते आधारशी लिंक करावे लागेल. हे खूप सोपे आहे:

रेल कनेक्ट ॲप किंवा IRCTC वेबसाइटवर लॉग इन करा.

'My Account' सेक्शनमध्ये जा.

तुमचा आधार नंबर टाका.

तुमच्या मोबाइलवर आलेल्या OTP ने पडताळणी करा.

ही प्रक्रिया पूर्ण झाल्यावर तुमचे प्रोफाइल आधारशी जोडले जाईल आणि तुम्ही सहजपणे तिकीट बुक करू शकाल.

तुम्ही जनरल किंवा तत्काळ तिकीट बुक करत असाल, तर तुमचे IRCTC खाते आधारशी जोडलेले आहे याची खात्री करा. सणासुदीच्या काळात जेव्हा खूप गर्दी असते, तेव्हा हे नियम तुमच्यासाठी खूप उपयोगी ठरतील. कारण यामुळे बनावट बुकिंगला आळा बसेल आणि तुम्हाला तिकीट मिळण्याची शक्यता वाढेल. त्यामुळे पुढच्या वेळी तिकीट बुक करण्यापूर्वी हे नवीन नियम नक्की लक्षात ठेवा आणि तुमचा प्रवास सुखकर करा.