TRENDING:
मुंबई पोलिस आणि अग्निशमनदलाच्या मदतीमुळे पुष्कर आणि त्याच्या मुलीचे प्राण वाचल्याचे पुष्करने त्याच्या सोशल मिडिया पोस्टमध्ये सांगितलं होतं. नुकतंच पुष्करने एका मुलाखतीत इमारतीला आग लागण्याच्या घटनेबद्दल सविस्तर माहिती सांगितली आहे, जी ऐकून कोणाच्याही अंगावर शहारे येतील.
शॉर्ट सर्किट अन् १२ व्या मजल्यावर आगीचा भडका
पुष्करने सांगितलं की, अंधेरी पश्चिमेकडील इमारतीत त्याची दोन घरं आहेत. आग लागली ती १२ व्या मजल्यावरील कॉमन एरियामध्ये. पुष्कर म्हणाला, "१२ व्या मजल्यावर शॉर्ट सर्किट झालं आणि आग वेगाने पसरू लागली. माझं तिथलं घर बाहेरच्या बाजूने पूर्णपणे खाक झालं आहे. ती आग इतकी भीषण होती की तिचा धूर वरच्या मजल्यांपर्यंत, म्हणजेच मी जिथे राहतो त्या १९ व्या मजल्यापर्यंत पोहोचला."
advertisement
"समोर काहीच दिसत नव्हतं, श्वास घेणं कठीण झालं..."
जेव्हा पुष्करला आग लागल्याचं समजलं, तेव्हा त्याने सावधगिरी म्हणून आपल्या लेकीला घेऊन बाहेर पडण्याचा प्रयत्न केला. पण जसं त्याने घराचं दार उघडलं, तसं समोर फक्त आणि फक्त काळाकुट्ट धूर होता. "दार उघडल्यावर समोर काहीच दिसत नव्हतं. इतका धूर होता की श्वास घेणं अशक्य झालं होतं. पुन्हा बाहेर जाणं म्हणजे मृत्यूला आमंत्रण देणं होतं, म्हणून आम्ही परत घरात आलो," असं पुष्करने सांगितलं.
बाथरुममध्ये काढली ४० मिनिटं
घरातही धूर शिरू लागला होता. अशावेळी काय करावं हे सुचेनासं झालं असताना पुष्करने एक निर्णय घेतला. तो आपल्या मुलीला घेऊन थेट बाथरुममध्ये गेला. तिथे धूर कमी होता. पुढची ४० मिनिटं ते दोघंही तिथेच होते. बाहेर आगीच्या ज्वाळा आणि धूर होता, तर आत हे बाप-लेक आपल्या जीवाची प्रार्थना करत होते.
मुंबईच्या रिअल हिरोंनी वाचवले प्राण
पुष्करने अत्यंत कृतज्ञतेने मुंबई पोलीस, बीएमसी आणि विशेषतः अग्निशमन दलाच्या जवानांचे आभार मानले आहेत. "त्यांनी योग्य वेळी येऊन आम्हाला त्या धुराच्या कोंडीतून बाहेर काढलं. माझ्या मुलीला सुरक्षित बाहेर काढल्याबद्दल मी त्यांचा आयुष्यभर ऋणी राहीन," अशा भावना त्याने व्यक्त केल्या. दरम्यान, पुष्करच्या घराचं मोठं नुकसान झालं असलं, तरीही त्यांचे प्राण वाचल्याबद्दल त्याने देवाचे आभार मानले आहेत. सिनेसृष्टीतील अनेक कलाकारांनी पुष्करची विचारपूस केल्याचं त्याने सांगितलं आहे.