इम्युनिटी कमी असणाऱ्यांनी घ्यावी विशेष काळजी
लहान मुले, वृद्ध व्यक्ती आणि दीर्घकालीन आजारांनी त्रस्त असलेले रुग्ण यांना या काळात विशेष सावधगिरी बाळगणे गरजेचे आहे. सकाळ-संध्याकाळ तापमानात होणाऱ्या फरकामुळे शरीराची नैसर्गिक प्रतिकारशक्ती कमी होते आणि त्यामुळे संसर्गजन्य आजार पटकन होतात. तज्ज्ञांचा सल्ला आहे की, हवामान बदलाच्या काळात शरीराला पुरेसा आराम आणि पौष्टिक आहार देणे अत्यंत आवश्यक आहे.
advertisement
Organ Donation: ‘तो’ जग सोडून गेला, पण तिघांना दिलं जीवनदान, मुंबईतील मन हेलावून टाकणारी घटना
आहारात बदल आणि घरगुती उपायांचा वापर करा
या काळात आहारामध्ये फळे, भाज्या, आणि भरपूर पाणी यांचा समावेश करावा. तळलेले आणि मसालेदार पदार्थ टाळावेत. त्याऐवजी हळदीचे दूध, काढा आणि ग्रीन टी यांचा वापर केल्याने शरीरात उष्णता आणि रोगप्रतिकारक शक्ती टिकून राहते. घरगुती उपाय आणि संतुलित आहार हे बदलत्या हवामानात आरोग्य टिकवण्याचे प्रमुख शस्त्र आहे, असे बीड जिल्हा रुग्णालयातील वरिष्ठ वैद्यकीय अधिकारी डॉ. पाटील यांनी सांगितले.
स्वच्छतेकडे दुर्लक्ष नको
हवामानातील बदलांमुळे हवेतील धूळ, परागकण आणि बुरशीचे प्रमाण वाढते. यामुळे श्वसनविकार, दमा आणि अॅलर्जीचे प्रमाण वाढत आहे. त्यामुळे घरात आणि परिसरात स्वच्छता राखणे, मास्कचा वापर करणे, आणि हात वारंवार धुणे ही सवय आवश्यक आहे. आरोग्य विभागाने नागरिकांना सार्वजनिक ठिकाणी गर्दी टाळण्याचे आणि आरोग्याबाबत जागरूक राहण्याचे आवाहन केले आहे.
योग्य जीवनशैलीच बदलत्या हवामानावरील उपाय
तज्ज्ञांच्या मते, नियमित व्यायाम, पुरेशी झोप आणि मानसिक ताण कमी ठेवणे हे आरोग्य टिकवण्यासाठी महत्त्वाचे आहे. हवामान बदल हा नैसर्गिक चक्राचा भाग असला, तरी सावधानता आणि आरोग्यदायी सवयी पाळल्यास त्याचे दुष्परिणाम कमी करता येतात. त्यामुळे नागरिकांनी हवामान बदलाशी लढा देण्यासाठी आरोग्यदायी सवयी अंगीकारा हा मंत्र लक्षात ठेवावा, असा संदेश आरोग्य विभागाकडून देण्यात आला आहे.