मोठ्या साइजच्या, जड इम्प्लांटऐवजी हलके, नैसर्गिक दिसणारे आणि शरीराशी जुळणारे पर्याय अधिक लोकप्रिय होत आहेत. अगदी काही महिला तर आधी बसवलेले इम्प्लांट काढून टाकण्याचाच निर्णय घेत आहेत. याच संदर्भात मॉडेल आणि अभिनेत्री शर्लिन चोप्रा अलीकडे चर्चेत आली. तिने स्वतःचे ब्रेस्ट इम्प्लांट काढून टाकल्याची माहिती इंस्टाग्रामवरील एका व्हिडिओद्वारे दिली.
तिच्या म्हणण्यानुसार, हा निर्णय घेतल्यावर तिच्या छातीवरील ओझं अक्षरशः हलकं झालं आहे. ती तरुण पिढीला अनावश्यक ओझं न वाहण्याचा सल्ला देते. कारण सौंदर्याचा खरा अर्थ आरामात आणि आत्मविश्वासात आहे, जबरदस्तीच्या बदलांमध्ये नाही.
advertisement
ब्रेस्ट इम्प्लांटची प्रक्रिया साधारण अशी असते की मेडिकल ग्रेड सिलिकॉनपासून तयार केलेले इम्प्लांट सर्जरीद्वारे ब्रेस्टमध्ये बसवले जातात. नवी दिल्लीतल्या सर गंगाराम सिटी हॉस्पिटलचे प्लास्टिक आणि कॉस्मेटिक सर्जन डॉ. रमन शर्मा सांगतात की ज्या महिलांचा ब्रेस्ट साइज जन्मतः लहान असतो, त्यांच्यासाठी ही प्रक्रिया अधिक उपयुक्त मानली जाते. पूर्वी मोठ्या इम्प्लांटकडे झुकणारी आवड होती, पण आज महिलांचा कल पूर्णपणे बदलला आहे. आता दिसण्यात नैसर्गिकता, शरीराच्या रचनेशी जुळणारा आकार आणि कम्फर्ट याला प्राधान्य दिलं जातं.
काही वेळा ब्रेस्ट इम्प्लांट फक्त इच्छेमुळेच नाही तर गरजेपोटीही काढावे लागतात. काही महिलांना कालांतराने इम्प्लांटमध्ये हार्डनेस जाणवतो, वेदना होतात किंवा दुर्मीळ प्रसंगी इम्प्लांट फाटण्याची शक्यता निर्माण होते. अशा वेळी इम्प्लांट काढून टाकणे हा सर्वोत्तम पर्याय ठरतो. डॉक्टर सांगतात की इम्प्लांट साधारणपणे सुरक्षित आणि टिकाऊ असतात, त्यामुळे कोणतीही अडचण नसेल तर त्यांना तसेच ठेवणेही योग्य असते.
या प्रक्रियेचा खर्च साधारण दीड लाख रुपयांच्या आसपास असतो, ज्यामध्ये इम्प्लांटपासून ते सर्जरीपर्यंत सर्वकाही समाविष्ट असतं. इम्प्लांट काढण्याची सर्जरी तुलनेने सोपी आणि कमी खर्चाची असते. सुमारे साठ ते सत्तर हजारांमध्ये ती पूर्ण होते. दोन्ही सर्जरी साधारण एक तासात पूर्ण केल्या जातात.
याचबरोबर, आज ‘हायब्रिड इम्प्लांट’चीही मागणी वाढताना दिसते. या पद्धतीमध्ये छोट्या साइजच्या इम्प्लांटसोबत शरीरातील फॅटही ब्रेस्टमध्ये भरलं जातं, ज्यामुळे साइज आणि आकार अधिक नैसर्गिक दिसतो. या प्रक्रियेला साधारण दोन तास लागतात आणि शरीरातील फॅट वेगळं काढून ते तयार करून ब्रेस्टमध्ये भरण्याची तंत्रशुद्ध पद्धत वापरली जाते. डॉक्टरांच्या मते, अनेक महिलांसाठी हा पर्याय अधिक सुरक्षित, नैसर्गिक आणि दीर्घकाळ टिकणारा ठरतो.