सावधान! रील बनवताय की चोरीची संधी देताय? अकोल्यात 'रीलबाज' मैत्रिणीचा 20 लाखांचा कारनामा उघड

अकोला शहरातील जुना शहर पोलीस ठाण्याच्या हद्दीत 12 फेब्रुवारी रोजी 19 लाखांचे सोन्याचे दागिने आणि 90 हजार रुपये रोख रक्कम चोरीला गेल्याची तक्रार एका महिलेने दाखल केली होती. घटनेचे गांभीर्य ओळखून पोलिसांनी तातडीने तपासाची चक्रे वेगाने फिरवली. अवघ्या नऊ दिवसांत या चोरीचा छडा लावत पोलिसांनी आरोपींना अटक केली असून, तपासात अनेक धक्कादायक बाबी समोर आल्या आहेत.

advertisement

कसं केलं मैत्रिणीने मैत्रिणीचं घर साफ? 

फिर्यादी महिलेची शेजारी राहणाऱ्या एका महिलेसोबत ओळख झाली होती. ही ओळख हळूहळू मैत्रीत रूपांतरित झाली आणि दिवसेंदिवस दोघींमधील विश्वास अधिक घट्ट होत गेला. या मैत्रीच्या नात्याचा गैरफायदा घेत आरोपी महिलेने फिर्यादी महिलेला रील बनवण्याच्या बहाण्याने आपल्या घरी बोलावले. रील तयार करत असताना फिर्यादीचे लक्ष विचलित करून आरोपीने अलमारीतील सोन्याचे दागिने व रोख रक्कम असा सुमारे 20 लाखांचा ऐवज लंपास केला.

एक महिला आणि तीन पुरुषांना अटक

चोरीनंतर आरोपी महिलेने हा ऐवज आपल्या तीन साथीदारांकडे लपवून ठेवला आणि सर्व काही गुपचूप घडवून आणले. मात्र पोलिसांनी गोपनीय माहितीच्या आधारे संशयितांवर नजर ठेवत चौकशी सुरू केली. अखेर आरोपी महिलेने आणि तिच्या तिन्ही साथीदारांनी चोरीची कबुली दिली. पोलिसांनी त्यांच्याकडून चोरीला गेलेला सुमारे 21 लाखांचा मुद्देमाल जप्त केला असून, एक महिला आणि तीन पुरुष आरोपींना अटक करण्यात आली आहे.

मैत्री आणि प्रसिद्धीच्या हव्यासातून कधी मोठी किंमत मोजावी लागली 

या घटनेमुळे समाजमाध्यमांच्या अतिरेकामुळे निर्माण होणाऱ्या धोक्यांकडे गांभीर्याने पाहण्याची गरज अधोरेखित झाली आहे. आभासी मैत्री आणि प्रसिद्धीच्या हव्यासातून कधी मोठी किंमत मोजावी लागू शकते, याचे हे ज्वलंत उदाहरण ठरले आहे. अनोळखी व्यक्तींवर पटकन विश्वास ठेवत कोणत्याही आमिषाला बळी न पडण्याचे आवाहन पोलिसांनी केले आहे.

हे ही वाचा :

3 पट पैशांचे आमिष, मित्रानेच घातला 1 कोटी 28 लाखांना गंडा, जालन्यात धक्कादायक प्रकार