माजी मंत्री राजेंद्र शिंगणे यांनी बुलडाणा जिल्ह्यातील सिंदखेडराजा मतदारसंघातील प्रमुख कार्यकर्ते आणि पदाधिकाऱ्यांची बैठक बोलावली होती. निवडणूक कशी लढावी, कुठून लढावी यासंदर्भात कार्यकर्ते पदाधिकाऱ्यांसोबत चर्चा करण्यासाठी आज बैठक संपन्न झाली. तुतारी चिन्हावरच लढावे, अशी बहुसंख्य पदाधिकाऱ्यांची इच्छा असल्याचे सांगत मी कार्यकर्त्यांच्या पुढे जाऊ शकत नाही, असे उघडपणे शिंगणे यांनी सांगत काहीच दिवसांत पवार गटात पक्षप्रवेश होणार असल्याचे संकेतच त्यांनी दिले.
advertisement
कार्यकर्ते पदाधिकाऱ्यांची इच्छा 'तुतारी'वरच लढा!
शिंगणे म्हणाले, "आज संपन्न झालेल्या बैठकीत तुतारी चिन्हावर लढावे, अशी भावना मतदार कार्यकर्ते आणि जनतेची होती. मतदारसंघात फिरत असताना लोक मला तुतारी घेऊनच लढा, असा आग्रह धरत आहेत. समाजातल्या सगळ्याच घटकांचा मला आग्रह आहे. २९ तारीख शेवटची असल्याने ताबडतोब निर्णय घेतला पाहिजे, म्हणून तातडीने आजची बैठक बोलावली होती. कार्यकर्त्यांची चर्चा करून निर्णय घेतला पाहिजे, या मताचा मी आहे"
कार्यकर्त्यांच्या मनातला निर्णय घेणार
"आदरणीय शरद पवारांसोबत जाऊन निवडणूक लढवावी असे ९९ टक्के पदाधिकाऱ्यांनी मला सांगितले. मी त्यांना सांगितलं मी केवळ मतदारसंघापुरता मर्यादित नाही. मी जिल्हाभरात जाऊन पदाधिकाऱ्यांसोबत बोलून निर्णय घेईन. परंतु कार्यकर्त्यांच्या मनातला निर्णय घेऊ" असे शिंगणे म्हणाले.
पवारसाहेबांच्या मार्गदर्शनामुळेच मी घडलो
पुढे बोलताना शिंगणे म्हणाले, आमच्या वडिलांपासून पवारसाहेबांचे आमच्याशी संबंध आहेत. मी राजकारणात आलो १९९५ साली... अपक्ष म्हणून निवडून आलो. पण तेव्हापासून पवारसाहेबांनी मला मार्गदर्शन केले. राष्ट्रवादीची स्थापना १९९९ साली झाली. तेव्हापासून मी पक्षात पवारसाहेबांसोबत काम केले, त्यांनी मला मंत्री केले, राज्यात काम करण्याची संधी दिली, आसे आवर्जून शिंगणे यांनी सांगितले.