TRENDING:
भाजपचा स्पष्ट बहुमतासह दणदणीत विजय
नाशिक महापालिकेच्या १२२ जागांपैकी भाजपने तब्बल ७२ जागा जिंकत बहुमताचा आकडा मोठ्या फरकाने पार केला आहे. बहुमतासाठी आवश्यक असलेल्या ६२ जागांपेक्षा भाजपकडे दहा नगरसेवक अधिक असल्याने सत्तास्थापनेबाबत कोणतीही शंका उरलेली नाही. या संख्याबळामुळे महापौरपद भाजपकडे जाणे जवळपास निश्चित झाले आहे.
स्थायी समितीवरही भाजपचे वर्चस्व
महापालिकेच्या आर्थिक व्यवहारांवर नियंत्रण ठेवणाऱ्या स्थायी समितीत एकूण १९ सदस्य असतात. नगरसेवक संख्येनुसार ठरवण्यात येणाऱ्या कोट्यानुसार भाजपला स्थायी समितीत १० सदस्य मिळण्याची शक्यता आहे. याउलट शिवसेना (शिंदे गट) आणि उद्धव ठाकरे गटाला प्रत्येकी २ सदस्य मिळू शकतात. अजित पवार गटाच्या राष्ट्रवादी काँग्रेसला उतरत्या क्रमाने एक जागा मिळण्याची शक्यता वर्तवली जात आहे.
advertisement
काँग्रेस आणि मनसेला बसणार फटका
यंदाच्या निवडणुकीत काँग्रेस आणि मनसे या दोन्ही पक्षांचे संख्याबळ मोठ्या प्रमाणात घटले आहे. काँग्रेसचे नगरसेवक मागील टर्मच्या तुलनेत निम्म्यावर आले असून, कोट्याअभावी यंदा काँग्रेसला स्थायी समितीत प्रतिनिधित्व मिळण्याची शक्यता नाही. मनसेचीही परिस्थिती तशीच असून, केवळ एकच नगरसेवक निवडून आल्याने त्यांनाही स्थायी समितीबाहेर राहावे लागणार आहे.
महापौरपदासाठी हालचालींना वेग
महापौरपदासाठी लवकरच आरक्षण सोडत होणार असली तरी, त्याआधीच इच्छुक नगरसेवकांकडून मोर्चेबांधणी सुरू झाली आहे. विशेषतः ओबीसी आणि राखीव प्रवर्गातील ज्येष्ठ नगरसेवक सक्रिय झाले असून, महापौरपद किंवा किमान स्थायी समितीच्या सभापतीपदासाठी पक्षश्रेष्ठींच्या भेटीगाठी वाढल्या आहेत. भाजपमधून पाचव्यांदा निवडून आलेले ज्येष्ठ नगरसेवक चंद्रकांत खोजे, तसेच सुधिया खोडे आणि माजी आमदार सानप यांचे पुत्र मच्छिंद्र सानप यांची नावे चर्चेत आहेत.