30 प्रवाशांनी भरलेल्या बसचा अपघात, खिडकीतून वाचवला जीव, गडचिरोलीत रात्री उशिरा थरार

नेमकं काय घडलं?

सिरोंचावरून रेगुंटाकडे जाणारी एसटी बस रात्रीच्या सुमारास कंबालपेटा नाला ते टेकडा दरम्यान आली होती. या ठिकाणी पुलाचे काम सुरू असल्याने एक कच्चा वळण मार्ग तयार करण्यात आला आहे. रात्रीच्या अंधारात वळण घेताना चालकाचा ताबा सुटला आणि बस थेट नाल्याच्या कडेला गेली. बस एका बाजूला पूर्णपणे झुकली आणि नाल्यात पडता पडता तिथेच अडकून राहिली.

advertisement

खिडकीतून काढला मार्ग!

बस पाण्यात कोसळणार असे वाटताच प्रवाशांमध्ये मोठी घबराट पसरली. बस एका बाजूला लटकलेली असताना प्रवाशांनी अत्यंत सावधगिरीने बसच्या खिडकीतून बाहेर उड्या मारल्या आणि स्वतःचा जीव वाचवला. हा नाल्यात ६ फुटांपर्यंत पाणी असून जर बस पूर्णपणे उलटली असती, तर मदतीसाठी कोणीही नसल्याने मोठी जीवितहानी झाली असती.

चालकाचा बेजबाबदारपणा

धक्कादायक बाब म्हणजे, अपघात होताच प्रवाशांना मदत करण्याऐवजी चालकाने स्वतः बसमधून उडी मारून तिथून पळ काढला. प्रवाशांनी स्वतःच्या हिमतीवर बाहेर पडून एकमेकांना वाचवले. रात्रीच्या वेळी हा सर्व थरार सुरू असताना परिसरात कोणाचेही साहाय्य मिळणे कठीण होते.

प्रशासनाविरुद्ध संताप

पुलाचे काम संथ गतीने सुरू असल्याने आणि कच्चा रस्ता नीट नसल्याने हा अपघात झाल्याचा आरोप स्थानिक नागरिकांनी केला आहे. प्रवाशांचे प्राण धोक्यात घालणाऱ्या त्या चालकावर आणि रस्ता दुरुस्तीकडे दुर्लक्ष करणाऱ्या प्रशासनावर कारवाई करण्याची मागणी आता जोर धरत आहे.