TRENDING:
आयुर्वेद तज्ज्ञ पत्नीची आत्महत्या
गंगापूर रोड परिसरातील डी. के. नगरमधील ‘रेवती ब्लू’ या घरात आयुर्वेद तज्ज्ञ डॉ. मनीषा जेजुरकर यांनी गळफास घेऊन आत्महत्या केली होती. या प्रकरणात त्यांच्या बहिणी प्रा. रोहिणी थोरात यांनी गंगापूर पोलिस ठाण्यात तक्रार दाखल केली आहे.
तक्रारीनुसार, २०२१ पासून डॉ. निलेश जेजुरकर यांनी पत्नी मनीषा यांच्याकडे दुर्लक्ष केले होते. घरातील साध्या निर्णयांसाठीही ते रुग्णालयातील एका वरिष्ठ महिला डॉक्टरांचा सल्ला घेत असल्याचे सांगितले जाते. यामुळे पती-पत्नीमध्ये वारंवार वाद होत असल्याचेही तक्रारीत नमूद करण्यात आले आहे.
advertisement
आरोपी डॉक्टर फरार
या प्रकरणात गुन्हा दाखल झाल्यानंतर डॉ. जेजुरकर सध्या बेपत्ता असल्याचे सांगितले जात आहे. गंगापूर पोलिसांनी त्यांच्या शोधासाठी विशेष पथके तयार केली असून तांत्रिक तपासाच्या मदतीने त्यांचा शोध घेण्याचे काम सुरू आहे.
दरम्यान, जिल्हा रुग्णालयातील त्यांच्या कार्यकाळाबाबतही विविध चर्चांना सुरुवात झाली आहे. तपासाचा विस्तार झाल्यास आणखी काही बाबी समोर येण्याची शक्यता वर्तवली जात आहे.
न्यायालयाच्या निर्णयाकडे लक्ष
या प्रकरणातील अटकपूर्व जामीन अर्जावर सोमवारी (१६ मार्च) सुनावणी होणार आहे. तोपर्यंत डॉ. जेजुरकर पोलिसांना शरण येतात की न्यायालयाकडून त्यांना दिलासा मिळतो, याकडे सर्वांचे लक्ष लागले आहे. तसेच या प्रकरणाचा तपास सहाय्यक पोलिस निरीक्षक हर्षल आहिरराव करत आहेत.