धरणगावमध्ये दोन गुलाबरावांची युती?
धरणगावमध्ये पालकमंत्री गुलाबराव पाटील आणि राष्ट्रवादी अजित पवार गटात प्रवेश केलेले माजी मंत्री गुलाबराव देवकर हे एकत्र येतील का, यावर संपूर्ण राजकीय समीकरण अवलंबून आहे. दोघांतील विधानसभेतील संघर्ष अद्याप थांबलेला नसला तरी धरणगाव येथील एका शिवसेना शिंदे गटाच्या मेळाव्यात पाटील यांनी देवकर आपल्या सोबत असतील असा संकेत दिले आहेत. मात्र ठाकरे गटाचे उपनेते गुलाबराव वाघ आणि माजी नगराध्यक्ष निलेश चौधरी हे या समीकरणाला कडवे आव्हान देण्याची शक्यता आहे. जळगव जिल्ह्यात शिवसेना शिंदे गट व शिवसेना ठाकरे गट यांच्यातच एकमेव प्रमुख लढत धरणगावात होणार होण्याची शक्यता असल्यामुळे ही निवडणूक अत्यंत चुरशीची होईल, अशी शक्यता आहे.
advertisement
चाळीसगावमध्ये चव्हाण विरुद्ध पाटील...
चाळीसगावमध्ये आमदार मंगेश चव्हाण आणि माजी खासदार उन्मेष पाटील यांच्यातील संघर्ष पुन्हा रंगणार आहे. दरम्यान, माजी आमदार दिवंगत राजीव देशमुख यांच्या निधनानंतर त्यांच्या परिवारातील सदस्याला महाविकास आघाडीने मैदानात उतरवल्यास ही निवडणूक सहानुभूती आणि प्रतिष्ठेची ठरण्याची शक्यता आहे. अर्थात तरी देखील हा सामना आमदार मंगेश चव्हाण आणि माजी खासदार उन्मेष पाटील असाच रंगेल, असेच सध्याचे चित्र आहे.
शिंदे गट आणि भाजपात दोस्तीत कुस्ती...
पाचोर्‍यात मात्र महायुतीतील शिवसेना शिंदे गट आणि भाजप यांच्यातील वादच प्रमुख ठरणार आहे. आमदार किशोर पाटील यांनी भाजपावर गद्दारीचा आरोप करत पालिका निवडणूक स्वतंत्र लढण्याची घोषणा साधारण महिनाभर आधीच करून टाकली आहे. तर मंत्री गिरीश महाजन यांनीही स्वबळावर लढण्याची तयारी दर्शवली आहे. यामध्ये आमदार किशोर पाटील यांच्या परिवारातील सदस्य उमेदवारी दाखल करणार असल्याने या नगरपालिकेची निवडणूक ‘हाय व्होल्टेज’ ठरणार आहे.
नगरपालिका की प्रतिष्ठेची निवडणूक...
जळगाव जिल्ह्यातील स्थानिक स्वराज्य संस्थांच्या निवडणुका या वेळेस केवळ पक्षनिष्ठेच्या नव्हे, तर स्थानिक नेत्यांच्या प्रतिष्ठेच्या लढती ठरणार आहेत. पालकमंत्री गुलाबराव पाटील आणि मंत्री गिरीश महाजन हे किती ठिकाणी महायुती म्हणून कार्यकर्त्यांना नगरपालिका निवडणूक एकत्र लढविण्यास तयार करतात यावर देखील जिल्ह्यातील पालिका निकाल अवलंबून राहतील. यामुळे दोघांची प्रतिष्ठा पणाला लागलेली असणार आहे.