सिंधू खरजुले ही जालन्यातील चंदनझिरा पोलीस स्थानकात हवालदार म्हणून कार्यरत आहे. समर्थनगर परिसरात राहणाऱ्या खरजुले यांना 70 हजारांवर पगार आहे. तरीही एका मोटारसायकल अपघातात गुन्हा नोंदवून घेण्यासाठी तिने 10 हजारांची लाच मागितली होती. तक्रारदाराची लाच देण्याची इच्छा नसल्याने त्याने लाचलुचपत प्रतिबंधक विभागाकडे लेखी तक्रार केली होती. तक्रारीवर पडताळणी केल्यानंतर जालना शहरातील चंदनझिरा पोलिस ठाण्यात सोमवारी सायंकाळी ही कारवाई करण्यात आली.
advertisement
नेमकं घडलं काय?
तक्रारदाराचे दाजी आणि भाचा मोटारसायकल अपघातात जखमी झाले. भाच्याच्या डोक्याला मार लागल्याने तो बेशुद्ध झाला. त्याला आधी सरकारी रुग्णालयात, नंतर कलावती हॉस्पिटलमध्ये दाखल करण्यात आले. तो सध्या उपचार घेत आहे. तक्रारदाराने चंदनझिरा पोलीस ठाण्यात अपघाताची तक्रार देण्यासाठी गेल्यावर सिंधू खरजुले हिने 10 हजारांची मागणी केली. तडजोडीत 5 हजार रुपये घेण्याचे ठरले. तक्रारदाराने याबाबत लाचलुचपत प्रतिबंधक विभागाकडे लेखी तक्रार दिली.
दरम्यान, एसीबीने सापळा रचून खरजुले हिला 5 हजारांची लाच घेताना रंगेहाथ पकडले. याप्रकरणी पुढील कारवाई सुरू आहे.