विधानसभा निवडणुकीत प्रचंड बहुमत मिळाल्यानंतर आज महायुती सरकारचा जवळपास 13 दिवसांनी शाही शपथविधी सोहळा पार पडणार आहे. पंतप्रधान नरेंद्र मोदी यांच्यासह, भाजप शासित राज्यांचे मुख्यमंत्री, महायुतीचे आमदार, पदाधिकारी, कार्यकर्ते उपस्थित राहणार आहेत. त्याशिवाय, भाजपकडून विरोधी पक्षांच्या नेत्यांनादेखील आमंत्रणे पाठवण्यात आली आहेत.
देवेंद्र फडणवीसांना फोन...ठाकरेदेखील येणार?
भाजप विधीमंडळ पक्षाचे गटनेते आणि मुख्यमंत्रीपदाची शपथ घेण्यासाठी सज्ज असलेले देवेंद्र फडणवीस यांनी ज्येष्ठ नेते शरद पवार यांना दूरध्वनीवरून शपथविधी सोहळ्याचे आमंत्रण दिले असल्याचे समोर आले आहे. सध्या शरद पवार आणि सुप्रिया सुळे हे संसदेच्या अधिवेशनानिमित्ताने दिल्लीत असल्याची माहिती समोर आली आहे. संसदेचे अधिवेशन सुरू असल्याने शपथविधीला उपस्थित राहता येणार नसल्याचं शरद पवार यांनी देवेंद्र फडणवीस यांनी कळवलं असल्याची माहिती समोर आली आहे.
advertisement
शपथविधीला ठाकरे बंधू येणार?
महायुती सरकारच्या शपथविधी सोहळ्यासाठी माजी मुख्यमंत्री आणि शिवसेना ठाकरे गटाचे पक्षप्रमुख उद्धव ठाकरे यांना आमंत्रित करण्यात आले आहे. मात्र उद्धव ठाकरे, आदित्य ठाकरे दोघेही कार्यक्रमाला उपस्थित राहणार नसल्याची माहिती सूत्रांनी दिली आहे. भाजप महायुतीला लोकसभा निवडणुकीत बिनशर्त पाठिंबा देणारे मनसे अध्यक्ष राज ठाकरे यांना देखील शपथविधीचे आमंत्रण देण्यात आले आहे. आता, राज ठाकरे हे आपल्या वैयक्तिक कामामुळे आजच्या शपथविधी सोहळ्याला अनुपस्थित राहणार असल्याची माहिती समोर आली आहे.