शिवसेना शिंदे गटाचे आमदार आणि नांदगावचे उमेदवार सुहास कांदे यांनी त्यांच्या कॉलेजवर ऊसतोड कामगारांना डांबून ठेवले असल्याचा आरोप समीर भुजबळांनी केला. भुजबळ यांनी कांदे यांच्या कॉलेजवर छापा मारला. त्यावेळी हा प्रकार समोर आला. त्या ठिकाणी असलेल्या हजारो लोकांना पैसे वाटप, जेवण दिले जात असल्याचे आढळून आले. त्यानंतर समीर भुजबळांनी याची माहिती पोलिसांना दिली.
advertisement
पोलीस घटनास्थळी दाखल झाल्यावर सुहास कांदेदेखील तिथे दाखल झाले. यावेळी त्यांनी जमलेली लोक मतदार असल्याचे सांगितले. समीर भुजबळ यांनी त्यावर आक्षेप घेतला. या दोघांमध्ये शाब्दिक चकमक झाली.
तुझा मर्डर फिक्स...
या वादावादी सुहास कांदे यांनी समीर भुजबळ यांच्या अंगावर जात अरेरावी केली. यावेळी त्यांनी आज रात्री तुझा मर्डर फिक्स असल्याची धमकी दिली. विशेष म्हणजे, या घटनेच्या वेळी पोलिसही उपस्थित होते. कांदे यांच्या धमकीनंतर वातावरण तंग झाले.
कार्यकर्त्यांमध्ये राडा...
दरम्यान, नांदगाव-मनमाड मार्गावर कांदे आणि भुजबळ यांच्या कार्यकर्त्यांमध्ये राडा झाला. सुहास कांदे यांनी बोलावलेल्या मतदारांना भुजबळांनी अडवले. त्यानंतर दोन्ही बाजूंनी वादावादी झाली. या वादावादीतून दोन्ही गटाचे कार्यकर्ते एकमेकांना भिडले. यावेळी पोलिसांनी हस्तक्षेप करत हाणामारी करणाऱ्यांना इतर कार्यकर्त्यांच्या मदतीने वेगळे केले.
राज्यात आज मतदान
महाराष्ट्र विधानसभेच्या 288 जागांसाठी एकाच टप्प्यात मतदान होणार आहे. शिवसेना आणि राष्ट्रवादी काँग्रेसमध्ये फूट पडल्यानंतर 6 मोठे पक्ष दोन आघाड्यांचा भाग म्हणून निवडणूक लढवत आहेत. मतदानाची जय्यत तयारी करण्यात आली आहे. सकाळी 7 वाजल्यापासून मतदानाला सुरुवात झाली आहे.
या मतदानासाठी ईव्हीएम यंत्रे कडेकोट पोलीस बंदोबस्तात मतदान केंद्रांपर्यंत पोहोचवण्यात आली आहेत. या निवडणुकीत 288 मतदारसंघात एकूण 4 हजार 140 उमेदवार निवडणूक रिंगणात नशीब आजमवत आहेत. 9 कोटी मतदार मतदानाचा हक्क बजावणार असून 1 लाख 427 मतदान केंद्रावर मतदानाची व्यवस्था करण्यात आली आहे. 288 मतदारसंघातील उमेदवारांचं भवितव्य ईव्हीएममध्ये कैद होणार आहे.