शरद पवारांच्या पठ्ठ्याने सगळी रेकॉर्ड मोडली, अवघ्या 21व्या वर्षी नगराध्यक्ष, कोण आहे सौरभ तायडे?

महाविकासआघाडीमध्ये काँग्रेसचे 34, ठाकरेंचे 9 आणि शरद पवारांचे 8 नगराध्यक्ष निवडून आले, पण या सगळ्यांमधला सगळ्यात लहान नगराध्यक्ष हा शरद पवारांच्या राष्ट्रवादीचा आहे. सिंदखेड राजा नगर परिषदेमध्ये राष्ट्रवादी काँग्रेस शरद पवार पक्षाचे सौरभ तायडे हे नगराध्यक्ष झाले. सौरभ तायडे यांचं वय 21 वर्ष 10 महिने आहे. सौरभ तायडे यांचा अवघ्या 169 मतांनी विजय झाला आहे. याचसोबत त्यांनी सगळ्यात कमी वयाचे नगराध्यक्ष होण्याचा विक्रमही केला आहे.

advertisement

22 वर्षांची सिद्धी नगराध्यक्ष

दुसरीकडे मोहोळ नगर परिषदेवर महाविद्यालयीन शिक्षण घेणाऱ्या 22 वर्षाच्या सिद्धी वस्त्रे हिने नगराध्यक्षपदाची निवडणूक जिंकली आहे. सामान्य कुटुंबातून आलेल्या सिद्धीने एका महिन्यात नगराध्यक्षपदाचा उमेदवारी अर्ज भरला आणि नगराध्यक्ष म्हणून निवडून यायचा विक्रमही केला. अवघ्या 22 व्या वर्षी नगराध्यक्ष झाल्यामुळे महाराष्ट्रभर सिद्धी वस्त्रेची चर्चा होत आहे.

सिद्धीचे वडील एका पतसंस्थेत कामाला असताना शिवसेना शिंदे पक्षाकडडून सिद्धीला उमेदवारी देण्यात आली. मोहोळ नगर परिषदेच्या निवडणुकीत सिद्धी वस्त्रेवर मतदारांनी विश्वास दाखवला. सिद्धीने भाजप उमेदवार शीतल क्षीरसागर यांचा फक्त 170 मतांनी पराभव केला. निवडणुकीच्या प्रचारावेळी उपमुख्यमंत्री एकनाथ शिंदे यांनी सिद्धीच्या उमेदवारीवरून आश्चर्यही व्यक्त केलं होतं. सीएच्या ऑफिसमध्ये काम करणारी सिद्धी अवघ्या एका महिन्यात मोहोळ नगर परिषदेची कारभारीण झाली आहे.