पुण्यात हातगाडीच्या वादातून रक्तरंजित हल्ला, हॉटेल मालकाचा हात तोडला

महर्षी नगर परिसरात हातगाडी लावण्याच्या कारणावरून स्थानिक हॉटेल मालक आणि काही तरुणांमध्ये वाद झाला. आधी केवळ बाचाबाची सुरू होती. मात्र, काही वेळातच हा वाद चिघळला आणि त्याचे रूपांतर मारहाणीत झाले. आरोपींनी संतापाच्या भरात धारदार शस्त्राने हॉटेल मालकावर आणि त्याच्या कामगारावर हल्ला केला.

दोघांवर हल्ला, हॉटेल मालकाचा हात तोडला

या हल्ल्यात हॉटेल मालक गंभीर जखमी झाला असून त्याचा हात तोडण्यात आल्याची धक्कादायक माहिती समोर आली आहे. तसेच त्याच्यासोबत असलेला कामगारही गंभीर जखमी झाला आहे. जखमींना तातडीने जवळच्या रुग्णालयात दाखल करण्यात आले असून त्यांच्यावर उपचार सुरू आहेत. या प्रकरणात किशोर राजू बनसोडे आणि प्रसाद यांच्यावर हल्ला झाला.

advertisement

आरोपी घटनास्थळावरून पसार, पोलिसांकडून आरोपींचा शोध सुरू

घटनेनंतर आरोपी घटनास्थळावरून फरार झाले असून पोलिसांकडून त्यांचा शोध सुरू करण्यात आला आहे. घटनेची माहिती मिळताच स्वारगेट पोलिसांनी घटनास्थळी धाव घेऊन पंचनामा केला. पोलिसांनी या प्रकरणाची गंभीर दखल घेत तपास सुरू केला आहे.