Rohit Pawar: बारामतीची पोटनिवडणूक जाहीर, रोहित पवारांची पहिली प्रतिक्रिया समोर

रोहित पवार आणि अजित पवार यांच्यातील नाते तसे एकदम खास. रोहित पवार हे भविष्यातील भारदस्त नेते होण्याची ताकद ठेवतात हे अजित पवार यांनी ओळखले होते. त्यामुळेच जिथे चुकेल तिथे काका म्हणून अधिकारवाणीने ते रोहित पवार यांना रागवत असत. रोहित पवार यांनीही काकांचे बोलणे मनाला लावून घेतले नाही. काही वर्षे राजकारणातील वाटा जरी वेगळ्या झाल्या तरी काका पुतण्याचे नाते त्यांनी प्रेमाने जपले. काका म्हणून रागावण्याचे ओरडण्याचे सगळे अधिकार रोहित पवार यांनी अजितदादांकडे जैसे थे ठेवले. एरवी राजकीय चूल वेगळी मांडल्यावर नात्यात दुरावा येतो. परंतु पवार घराण्यातील शिकवणीमुळे त्यांच्या नात्यात कधी अंतर पडले नाही. अजितदादांच्या आठवणीत  रोहित पवार अनेकदा भावूक झाल्याचे पाहायला मिळाले. आजही निवडणुकीचा कार्यक्रम जाहीर झाल्यानंतर रोहित पवारांनी आपल्या भावना व्यक्त केल्या आहेत.

advertisement

गेली अनेक दशकं बारामती विधानसभा मतदारसंघातून निर्विवादपणे अजितदादा निवडून येत होते. आता दादांच्या जागेवर पोटनिवडणूक होत असल्याने रोहित पवार भावूक झाले. कधी कधी वास्तव हे कल्पनेपेक्षाही अधिक भयंकर असतं, असे म्हणत आपल्या भावना व्यक्त केल्या आहेत.

काय म्हणाले रोहित पवार? 

रोहित पवार म्हणाले, ज्या निवडणुकीत फक्त मताधिक्याचीच चर्चा व्हायची त्या बारामती मतदारसंघात कधी पोटनिवडणूक घ्यावी लागेल, असं कुणाला स्वप्नातही कधी वाटलं नाही.. पण दुर्दैवाने अजितदादा आपल्यातून गेले आणि आज बारामती विधानसभा मतदारसंघासाठी पोटनिवडणूक जाहीर झाली. कधी कधी वास्तव हे कल्पनेपेक्षाही अधिक भयंकर असतं..

बारामतीत सलग आठ वेळा निवडून आले

अजितदादा पवार यांनी बारामती विधानसभा निवडणूक एकूण 8 वेळा लढवली. आणि सर्व वेळा त्यांनी विजय मिळवला. ते प्रामुख्याने बारामती विधानसभा मतदारसंघातून निवडून येत होते. 1991 ते 2024 या कालावाधीत सलग आठ वेळा ते निवडून आले. बारामती विधानसभा पोटनिवडणुकीकरिता सुनेत्रा पवार यांचा सध्यातरी एकमेव अर्ज असणार असल्याचे सोबत असणाऱ्या पक्षांनी जाहीर केले आहे परंतु बारामती विधानसभा पोटनिवडणुकीकरिता सुनेत्रा पवार यांच्या विरोधात इतर पक्षामार्फत उमेदवार उभा केला जाणार असल्याची माहिती सूत्रांकडून मिळत आहे