संकटांशी डोळ्यांत डोळे भिडवत संतोष देशमुखांची लेक वैभवी जिद्दीने उभी राहिली. मस्साजोग गावाचे सरपंच संतोष देशमुख यांच्या निर्घृण हत्येनंतर उभ्या कुटुंबावर दुःखाचा डोंगर कोसळला. देशमुख यांच्या समर्थनार्थ निघालेल्या आंदोलनात, न्याय मागणीच्या लढ्यात वैभवी ही आपला काका धनंजय देशमुखांसोबत अग्रेसर होती.
अन्यायाविरोधात लढणाऱ्या वडिलांची गावातील गुंडांनी हत्या केली. त्यांच्या निधनानंतरचा मानसिक आघात पचवतानाच वैभवीने आपलं शैक्षणिक ध्येय डोळ्यांसमोर कायमच ठेवलं.
advertisement
वैभवीला डॉक्टर बनवण्याचे होते स्वप्न, मार्कशीट आली समोर...
दुःख, अन्याय, आणि संघर्षाच्या छायेतून वैभवीने आपली वाट निर्माण केली. वैभवीने बारावीची परीक्षा विज्ञान शाखेतून दिली. वैभवीला बारावीच्या परीक्षेत 85.33 टक्के गुण मिळाले. दिवंगत सरपंच संतोष देशमुख यांना वैभवीला डॉक्टर करण्याचे स्वप्न होते. वडिलांचे छत्र हरपल्यानंतरही वैभवीने घवघवीत यश मिळवले. वैभवीने बायोलॉजीमध्ये 98 टक्के गुण मिळवले. तर, फिजिक्समध्ये 83 आणि केमिस्ट्रीत 91 गुण मिळाले. गणितामध्येही वैभवीला 94 गुण मिळाले.
बारावीची परीक्षा तोंडावर असताना संपूर्ण घर संकटात असतानाही वैभवीने हार मानली नाही. अनेकदा पोलिस चौकशी, आजूबाजू निर्माण झालेली कष्टदायक परिस्थिती या सगळ्या त्रासदायक पार्श्वभूमीतून वाट काढत वैभवीने अभ्यास सुरू ठेवला आणि अखेर आजच्या बारावीच्य निकालात उत्तुंग यश संपादन केले.