TRENDING:
सुनेत्रा पवार यांनी उपमुख्यमंत्री म्हणून शपथ घेतली. अजित पवार यांच्या निधनानंतर पोरक्या झालेल्या राष्ट्रवादीच्या अजित पवार गटाला सावरण्यासाठी आणि शरद पवारांच्या 'विलीनीकरणाच्या' रणनीतीला शह देण्यासाठी पडद्यामागे अत्यंत वेगवान हालचाली झाल्या. बारामतीतील 'सहयोग सोसायटी' ते मुंबईतील 'देवगिरी' बंगला यादरम्यान घडलेला हा राजकीय थरार केवळ सत्तेसाठी नव्हता, तर तो अस्तित्वाच्या लढाईचा भाग असल्याचे समोर आले आहे.
advertisement
शरद पवारांचा 'विलीनीकरण' डाव आणि नेत्यांचा विरोध
सूत्रांनी दिलेल्या माहितीनुसार, अजित पवारांच्या निधनानंतर शरद पवार पुन्हा सक्रिय झाले होते. दोन्ही राष्ट्रवादी काँग्रेस एकत्र करून सुप्रिया सुळे यांच्याकडे नेतृत्व सोपवण्याच्या त्यांच्या हालचाली सुरू होत्या. मात्र, अजित पवार गटातील छगन भुजबळ आणि प्रफुल्ल पटेल यांसारख्या ज्येष्ठ नेत्यांना हे मान्य नव्हते. सुप्रिया सुळे यांनी अजितदादांच्या अंत्यविधीवेळी सर्व सूत्रे हाती घेणे या नेत्यांना खटकले होते. शरद पवारांना वेळ दिल्यास आपला गट पूर्णपणे संपून जाईल, अशी भीती या नेत्यांना होती.
फडणवीसांसोबत गुप्त बैठक आणि 'चकवा'
याच धास्तीपोटी प्रफुल्ल पटेल आणि छगन भुजबळ यांनी उपमुख्यमंत्री देवेंद्र फडणवीस यांची भेट घेतली. दोन सत्रात दीड तास चर्चा झाल्यानंतर बाहेर पडताना पटेलांनी "अद्याप नेता ठरलेला नाही" असे सांगून शरद पवार गटाला गाफील ठेवले. शरद पवारांना वाटले की अद्याप वेळ आहे, पण त्याच वेळी राजकीय सल्लागार नरेश अरोरा यांच्यामार्फत सुनेत्रा पवारांना उपमुख्यमंत्रिपदासाठी राजी करण्याची फिल्डिंग लावली गेली असल्याचे सांगण्यात येत आहे.
रातोरात बारामती सोडली अन्...
शुक्रवारी रात्री ८ च्या सुमारास सुनेत्रा पवार उपमुख्यमंत्रिपदासाठी तयार असल्याची बातमी वाऱ्यासारखी पसरली. त्या बाहेर पडण्यापूर्वी शरद पवारांशी चर्चा करतील, असा अंदाज 'गोविंदबाग'ला होता. पण मुंबईतून सूत्रे हलवणाऱ्यांनी वेगळीच योजना आखली होती. सुनेत्रा पवारांना तातडीने बारामतीबाहेर काढण्यात आले. त्यांच्या सुरक्षेसाठी पोलिसांचा मोठा ताफा तैनात करण्यात आला. सुनेत्रा पवारांच्या हालचाली, त्या कोणत्या ठिकाणी दाखल झाल्यात, याची माहिती पोलिसांच्या ताफ्याच्या माध्यमातून मिळवण्याचा प्रयत्न असल्याचे म्हटले जात आहे. मात्र, सुनेत्रा पवार ह्या बारामतीमधून रातोरात मुंबईत दाखल झाल्या आणि शपथविधीवर शिक्कामोर्तब झाले.
पार्थ आणि जय पवारांची विभागलेली जबाबदारी
या संपूर्ण रणनीतीत अजित पवारांच्या दोन्ही मुलांवर महत्त्वाची जबाबदारी होती. जय पवार हे आई सुनेत्रा पवारांसोबत मुंबईत तळ ठोकून होते, तर पार्थ पवारांना मुद्दाम बारामतीतच थांबवण्यात आले होते. शनिवारी सकाळी जेव्हा शरद पवारांनी पत्रकार परिषद घेऊन "मला शपथविधीबद्दल काहीही माहिती नाही" असे सांगितले, तेव्हा पार्थ पवार त्यांना भेटायला गेले. कौटुंबिक जिव्हाळा जपत राजकीय डावपेच खेळण्याचा हा प्रयत्न यशस्वी ठरला.
सुनेत्रा पवारांच्या या शपथविधीने केवळ सत्तेचे समीकरण बदलले नाही, तर शरद पवारांच्या विलीनीकरणाच्या प्रयत्नांना मोठा धक्का दिला आहे. आगामी काळात बारामती आणि मुंबईच्या राजकारणात राष्ट्रवादीतील 'पवार विरुद्ध पवार' असा संघर्ष होणार की आणखी नाट्यमय घडामोडी होणार, याकडे अनेकांचे लक्ष लागले आहे.