TRENDING:
महाराष्ट्रासह १० राज्यांमध्ये राज्यसभेच्या ३७ जागांसाठी १६ मार्च रोजी निवडणुका होणार आहेत. महाराष्ट्राच्या सात जागांसाठीची अधिसूचना २६ फेब्रुवारी रोजी जारी करण्यात आली. नामांकन दाखल करण्याची शेवटची तारीख ५ मार्च आहे. ३ आणि ४ मार्च रोजी होळीची सुट्टी असल्याने, नामांकन दाखल करण्यासाठी फक्त ५ मार्च शिल्लक आहे. अशावेळी महाविकास आघाडीतून राज्यसभेवर कोण जाणार, याचे चर्चेचे गुऱ्हाळ अद्याप सुरूच आहे.
advertisement
शरद पवार यांचे नाव निश्चित?
राज्यसभा निवडणुकीच्या उमेदवारीसाठी महाविकास आघाडीकडून शरद पवार हे इच्छुक आहेत. परंतु शिवसेना पक्षाने या जागेवर आपला दावा सांगितला आहे. त्यामुळे सुप्रिया सुळे आणि जयंत पाटील यांनी शिवसेनेची भूमिका जाणून घेण्यासाठी उद्धव ठाकरे यांची भेट घेतली. या भेटीत चर्चेअंती शरद पवार यांच्या नावाला शिवसेनेने पाठिंबा दिल्याची माहिती मिळते आहे.
शरद पवार जर उमेदवार नसतील तर भारतीय जनता पक्ष सातव्या जागेवरही आपला उमेदवार देऊ शकतो. त्यामुळे महाविकास आघाडीने सातव्या जागेबद्दल अधिक धोका न पत्करता शरद पवारच उमेदवार असायला हवेत, अशी चर्चेही बैठकीत झाल्याची माहिती आहे.
शिवसेना काँग्रेसने पाठिंबा द्यावा, सुप्रिया सुळे यांची विनंती
राज्यसभा निवडणुकीत राष्ट्रवादी पक्षाचे उमेदवार शरद पवार यांना पाठिंबा देण्यासाठी उभय नेत्यांमध्ये चर्चा होत असल्याची माहिती सूत्रांनी दिली. शिवसेना आणि काँग्रेसने शरद पवार यांना पाठिंबा द्यावा, अशी विनंती सुप्रिया सुळे आणि जयंत पाटील यांनी उद्धव ठाकरे यांना केली. उद्या काँग्रेसच्या वरिष्ठ नेत्यांनाही सुप्रिया सुळे-जयंत पाटील भेटण्याची शक्यता आहे.