TRENDING:
समोर आलेल्या माहितीनुसार, कामठी येथील कचरीपुरा भागात राहणारे महादेव पारसे हे आपल्या पत्नी, मुलासह आणि काही नातेवाईकांसह एका तवेरा गाडीने राजस्थानमधील खाटू श्याम आणि सालासर बालाजीच्या दर्शनासाठी गेले होते. गुरुवारी सालासर रोडवर प्रवास करत असताना समोरून येणाऱ्या एका भरधाव पिकअप गाडीने त्यांच्या तवेराला जोरदार धडक दिली. ही धडक इतकी भीषण होती की तवेरा गाडीचा अक्षरशः चक्काचूर झाला.
advertisement
सहा जण गंभीर जखमी
या हृदयद्रावक अपघातात महादेव पारसे, त्यांच्या पत्नी कांता पारसे आणि मुलगा घनश्याम पारसे या तिघांचा जागीच मृत्यू झाला. एकाच वेळी कुटुंबातील तीन प्रमुख सदस्य गेल्याने पारसे कुटुंबावर दुःखाचा डोंगर कोसळला आहे. याशिवाय, गाडीचा चालक मनोज चिंदमवार यांच्यासह आराधना पारसे, पायल पारसे, पल्लवी पारसे, पुनम पारसे, तुषार पारसे आणि पवन बागडे हे सहा जण गंभीर जखमी झाले आहेत.
कुटुंबावर शोककळा
अपघाताची बातमी कामठीच्या कचरीपुरा भागात पोहोचताच संपूर्ण शहरात सन्नाटा पसरला आहे. धार्मिक यात्रेसाठी गेलेले आपले शेजारी आता कधीच परतणार नाहीत, या कल्पनेने स्थानिकांना अश्रू अनावर झाले आहेत. सर्व जखमींना सालासर येथील स्थानिक रुग्णालयात दाखल करण्यात आले असून त्यांच्यावर उपचार सुरू आहेत. मयतांचे मृतदेह शवविच्छेदनानंतर राजस्थानहून कामठी येथे आणले जाणार असून, संपूर्ण शहराने या दुर्दैवी घटनेबद्दल दुःख व्यक्त केले आहे.