Mumbai LPG Crisis: मुंबईकरांची भूक भागवणारा वडापाव संकटात, प्लेटमधून गायब होणार समोसा-भजी! कारण काय?

मुंबईची ओळख असलेल्या या स्ट्रीट फूडवर आता संकटाचे सावट पसरले आहे. व्यावसायिक एलपीजी (LPG) सिलिंडरच्या तुटवड्यामुळे मुंबईकरांचा लाडका वडापाव, गरमागरम समोसे आणि भजी रस्त्यांवरून गायब होऊ लागली आहेत. रिक्षाचालक, टॅक्सीचालक आणि सामान्य कामगारांची भूक भागवणारे हे पदार्थ गॅसअभावी मिळणे कठीण झाले आहे.

प्रसिद्ध दुकानांनाही बसला फटका

लालबागचा प्रसिद्ध 'लाडू सम्राट' असो वा जुहूचे लोकप्रिय 'गुलाटी', सर्वांनाच या टंचाईचा फटका बसला आहे. 'लाडू सम्राट'चे मालक कमलाकर राक्षे म्हणाले, " बुधवारी, आमचे दुकान बंद होते. गुरुवारी चार सिलिंडर मिळाले म्हणून दुकान उघडले, पण पुढे काय होईल सांगता येत नाही." दुसरीकडे, जुहूच्या गुलाटी रेस्टॉरंटने समोशांच्या ऑर्डर्स घेणे बंद केले आहे. मालक विकी गुलाटी यांनी चिंता व्यक्त केली की, जर ही टंचाई अशीच राहिली तर त्यांच्या १०० कर्मचाऱ्यांच्या जेवणाचा आणि रोजगाराचा प्रश्न गंभीर होईल.

advertisement

पाव आणि ब्रेडही संकटात...

मुंबईकरांसाठी महत्त्वाचे असणारे पाव-ब्रेडदेखील संकटात आहेत. पाव-ब्रेडच्या पुरवठ्यावरही आता संकट निर्माण झाले आहे. काही महिन्यांपूर्वीच कोळशाआधारीत बेकरी बंद करण्याचे आदेश मुंबई महापालिकेने काढले होते. गॅसआधारीत भट्टी सुरू करण्याचे निर्देश दिले होते. त्यातील काही बेकरींकडूनच गॅसच्या भट्टीचा वापर सुरू झाला होता. तर, इतरांनी बेकरी बंद ठेवण्याचा निर्णय घेतला होता. त्यामुळे पावाच्या उत्पादनावर परिणाम झालेला. आता, गॅसच्या टंचाईमुळे पाव-ब्रेडचे उत्पादन कमी होण्याची भीती आहे.

काळ्या बाजारात सिलिंडरची विक्री

व्यावसायिक सिलिंडर मिळत नसल्याने अनेक छोटे स्टॉलधारक घरगुती सिलिंडरचा वापर करत आहेत. काळा बाजारमध्ये सिलिंडर १,३०० ते १,८०० रुपयांना विकले जात असल्याची चर्चा सुरू आहे.