विदर्भातील पहिली ओबीसी एल्गार सभा वर्ध्यामध्ये होत आहे. वर्धा शहरातील जुन्या आरटीओ ऑफिसच्या मैदानावर सकाळी 11 वाजता ही सभा सुरू होणार होती. मात्र, भुजबळ, पडळकर यांच्यासारख्या नेत्यांनी अचानक दांडी मारल्याने ही सभा सुरू व्हायला दुपारचा एक वाजला. विदर्भातील ही पहिली ओबीसी एल्गार सभा असून सभेला एका लाखांच्या जवळपास ओबीसी बांधव उपस्थित राहणार असल्याचं आयोजकांनी सांगितले होतं.
advertisement
मंत्री छगन भुजबळ, आ. गोपीचंद पडळकर यांनी फिरवली सभेकडे पाठ
या महाएल्गार सभेला छगन भुजबळ हे मुख्य मार्गदर्शन करणार होते. तर प्रकाशअण्णा शेडगे, महादेव जानकर, खा. रामदास तडस, आ. गोपीचंद पडळकर, डॉ. बबनराव तायवाडे, शब्बीर अन्सारी, प्रा. लक्ष्मण हाके, प्रा. लक्ष्मण गायकवाड व विरोधी पक्षनेते विजय वडेट्टीवार यांची उपस्थिती राहणार होती. मात्र, आता भुजबळ आणि पडळकर गैरहजर असल्याचे समोर आले आहे. तब्येतीच्या कारणांमुळे छगन भुजबळ यांचा वर्धा दौरा रद्द झाल्याची माहिती आहे. त्यामुळे मंत्री छगन भुजबळ, आमदार गोपीचंद पडळकर यांनी या सभेकडे पाठ फिरवल्याचे बोलले जात आहे.
वाचा - मराठा आरक्षणाला सर्वाधिक विरोध कोणी केला? फडणवीसांच्या निशाण्यावर पुन्हा शरद पवार
मराठा बांधवांना आरक्षण मिळावे; पण ते ओबीसींच्या प्रवर्गातून नाही तर स्वतंत्र आरक्षण द्यावे, या प्रमुख मागणीसोबतच शिंदे समिती बरखास्त करून ओबीसींची जातीनिहाय जनगणना करा, अशी ओबीसी बांधवांची मागणी आहे. सध्या सुरू असलेल्या हिवाळी अधिवेशनातही छगन भुजबळ यांनी मराठा आरक्षणावरुन आक्रमक भूमिका मांडत जरांगे पाटलांवर हल्लाबोल केला होता. मात्र, आज अचानक गैरहजर राहिल्याने चर्चांना उधाण आलं आहे.