TRENDING:
रेल्वेचा नवा 'क्राउड मॅनेजमेंट' फंडा
पश्चिम रेल्वेने उपनगरी लोकलमध्ये चढ-उतारावेळी होणारी गर्दी आणि गोंधळ कमी करण्यासाठी पश्चिम रेल्वेने नालासोपारा स्थानकावर नवीन उपक्रम सुरू केला आहे. प्रत्येक डब्याच्या दारासमोर फलाटावर रंगीत पट्टे आणि पायचिन्हे काढण्यात आली आहेत. प्रवाशांनी त्या चिन्हांवर रांगेत उभे राहून आधी उतरणाऱ्या प्रवाशांना मार्ग द्यावा आणि त्यानंतरच गाडीत चढावे असे आवाहन करण्यात आले आहे.
advertisement
नालासोपाऱ्यात रेल्वेने असा राबवला मेट्रो पॅटर्न
सकाळच्या गर्दीच्या वेळेत खास करुन (सकाळी 6 ते 11) नालासोपारा स्थानकावर मोठ्या प्रमाणात प्रवासी ये-जा करतात. त्यामुळे रेल्वे प्रशासनाने विशेष क्राउड मॅनेजमेंट मोहीम राबवली. या मोहिमेत आरपीएफ आणि एमएसएफचे एकूण 22 कर्मचारी सहभागी झाले होते. त्यामध्ये 12 आरपीएफ आणि 10 एमएसएफ जवानांचा समावेश होता.
कर्मचाऱ्यांनी प्लॅटफॉर्मवर उभे राहून प्रवाशांना दोन रांगांमध्ये उभे राहण्यास सांगितले. गाडी थांबल्यानंतर आधी उतरणाऱ्यांना जागा देण्याचा सरावही करून घेतला. या उपक्रमामुळे चढ-उतार अधिक शिस्तीत होण्यास मदत होत आहे.
स्थानकांवरही ही पद्धत लवकर लागू
ही योजना पुढील दोन महिने चाचणी म्हणून सुरू ठेवली जाणार आहे. हा प्रयोग यशस्वी ठरल्यास इतर गर्दीच्या स्थानकांवरही अशीच रंगीत मार्किंग आणि रांग पद्धती लागू केली जाईल अशी माहिती मुंबई विभागाचे विभागीय व्यवस्थापक पंकज सिंग यांनी दिली.
लोकल प्रवास सुरक्षित आणि सोयीस्कर करण्यासाठी हा महत्त्वाचा टप्पा मानला जात आहे. प्रवाशांकडूनही या उपक्रमाला चांगला प्रतिसाद मिळत असल्याचे रेल्वे प्रशासनाने सांगितले.