Mumbai Water Cut: मुंबईकरांनो पाणी भरुन ठेवा! 'या' तीन वॉर्डात चार दिवस पाणी नाही, कोणत्या भागांना फटका? वाचा यादी

परिणामी, जी उत्तर, के पूर्व आणि एच पूर्व विभागातील काही भागांचा पाणीपुरवठा कमी दाबाने होणार आहे. तसेच, नियमित पाणीपुरवठ्याच्‍या वेळेतदेखील बदल होणार आहे, याची नागरिकांनी कृपया नोंद घ्‍यावी, असे आवाहन बृहन्‍मुंबई महानगरपालिका प्रशासनाच्‍या वतीने करण्‍यात येत आहे. मुंबई महानगर प्रदेश विकास प्राधिकरण (एमएमआरडीए) च्‍या मेट्रो लाईन 7अ प्रकल्पाच्या कामासाठी 2400 मिलीमीटर व्यासाच्या अपर वैतरणा मुख्य जलवाहिनीचा काही भाग वळविण्यात आला आहे. या वळविण्यात आलेल्या भागाचे छेद- जोडणी (क्रॉस- कनेक्शन) चे काम बृहन्मुंबई महानगरपालिकेमार्फत करण्यात येणार आहे.

advertisement

कार्यवाही अत्यंत महत्त्वाची असून नियोजनबद्ध पद्धतीने व तांत्रिक निकषांचे पालन करून करण्यात येणार आहे. या दरम्यान नागरिकांना पाणीपुरवठ्यात कमीतकमी अडथळा येईल, यासाठी आवश्यक ते नियोजन करण्यात आले आहे. सोमवार, दिनांक 22 डिसेंबर 2025 रोजी सकाळी 10 वाजेपासून शुक्रवार, दिनांक 26 डिसेंबर 2025 रोजी दुपारी 1 वाजेपर्यंत जलवाहिनी जोडणीची कामे सुरु राहणार आहेत. त्‍यामुळे जी उत्तर, के पूर्व आणि एच पूर्व विभागातील काही भागांचा पाणी पुरवठा कमी दाबाने होणार आहे. बाधित होणाऱ्या प्रशासकीय विभागांचा आणि पाणी पुरवठ्याचं बदललेल्‍या वेळेचा तपशील पुढीलप्रमाणे आहे,

1. जी उत्तर विभाग-

धारावी सकाळचा पाणी पुरवठा- जस्मिन मील मार्ग, माटुंगा कामगार वसाहत, संत रोहिदास मार्ग, 60 फूट मार्ग, 90 फूट मार्ग, संत कक्कैया मार्ग, एम. पी. नगर ढोरवाडा, महात्मा गांधी मार्ग नियमित पाणी पुरवठ्याची वेळ पहाटे 04:00 ते दुपारी 12:00 अशी असणार आहे. सोमवार, दिनांक 22 डिसेंबर ते गुरुवार, दिनांक 25 डिसेंबर 2025 दरम्यान दररोज सकाळी 09:00 ते सायंकाळी 05:00 या वेळेत कमी दाबाने पाणी पुरवठा होणार आहे.

धारावी सायंकाळचा पाणीपुरवठा - धारावी मुख्य मार्ग, गणेश मंदीर मार्ग, दिलीप कदम मार्ग, जस्मिन मील मार्ग, माहीम फाटक, ए. के. जी. नगर या भागामध्ये नियमित पाणीपुरवठ्याची वेळ सायंकाळी 04:00 ते रात्री 09:00 पर्यंत अशी असणार आहे. सोमवार, दिनांक 22 डिसेंबर ते गुरुवार, दिनांक 25 डिसेंबर 2025 दरम्यान दररोज सायंकाळी 05:00 ते रात्री 10:00 या वेळेत कमी दाबाने पाणीपुरवठा होणार आहे.

2. के पूर्व विभाग- कबीर नगर, बामणवाडा, पारसीवाडा, विमानतळ क्षेत्र, तरुण भारत वसाहत, इस्लामपुरा, देऊळवाडी, पी ऍन्ड टी वसाहत या भागामध्ये नियमित पाणी पुरवठ्याची वेळ दुपारी 02:00 ते सायंकाळी 05:30 पर्यंत असणार आहे. सोमवार, दिनांक 22 डिसेंबर ते गुरुवार, दिनांक 25 डिसेंबर 2025 दरम्यान दररोज दुपारी 02:00 ते सायंकाळी 05:30 या वेळेत कमी दाबाने पाणीपुरवठा होणार आहे.

कोलडोंगरी, जुनी पोलीस गल्ली, विजय नगर (सहार रस्ता) आणि मोगरापाडा या भागातल्या नियमित पाणीपुरवठ्याची वेळ सायंकाळी 05:00 ते रात्री 10:00 अशी असणार आहे. सोमवार, दिनांक 22 डिसेंबर ते गुरुवार, दिनांक 25 डिसेंबर 2025 दरम्यान दररोज सायंकाळी 05:00 ते रात्री 10:00 या वेळेत कमी दाबाने पाणीपुरवठा होणार आहे.

3. ‘एच पूर्व’ विभाग- वांद्रे- कुर्ला संकुल (बीकेसी) मोतिलाल नगरसह या भागात नियमित पाणीपुरवठ्याची वेळ रात्री 10:00 ते रात्री 11:40 अशी असणार आहे. सोमवार, दिनांक 22 डिसेंबर ते गुरुवार, दिनांक 25 डिसेंबर 2025 दरम्यान दररोज रात्री 10:00 ते रात्री 11:40 या वेळेत कमी दाबाने पाणीपुरवठा होणार आहे.

प्रभात वसाहत, टीपीस-३, आग्रीपाडा, कलिना, सीएसटी मार्ग, हंसभुग्रा मार्ग, विद्यापीठ, सीएसटी मार्गाची दक्षिण बाजू, यशवंत नगर, सुंदर नगर, कोलिवरी गाव, तीन बंगला, शांतिलाल कंपाऊंड, पटेल कंपाऊंड, गोळीबार मार्ग, खार भुयारी मार्ग (सब वे) ते खेरवाडी, नवापाडा, बेहराम नगर, ए. के. मार्ग, शासकीय वसाहत वांद्रे (पूर्व) या भागात नियमित पाणीपुरवठ्याची वेळ मध्यरात्री 03:30 नंतर ते सकाळी 09:00 पर्यंतची असणार आहे. तर, मंगळवार, दिनांक 23 डिसेंबर ते गुरुवार, दिनांक 25 डिसेंबर 2025 दरम्यान दररोज मध्यरात्री 03:30 नंतर ते सकाळी 09:00 या वेळेत कमी दाबाने पाणीपुरवठा केला जाणार आहे.

जी उत्तर, के पूर्व आणि एच पूर्व विभागातील नागरिकांनी खबरदारीचा उपाय म्हणून पाण्याचा आवश्यक साठा करुन ठेवावा. दुरुस्तीच्या कालावधीत काटकसरीने पाणी वापरावे. तसेच खबरदारीचा उपाय म्हणून पुढील काही दिवस पाणी उकळून, गाळून प्‍यावे, महानगरपालिकेला सहकार्य करावे, असे आवाहन बृहन्मुंबई महानगरपालिका प्रशासनाच्या वतीने नागरिकांना करण्यात येत आहे.