विमानाच्या इंजिनमध्ये बिघाड
कोलकाता विमानतळ अधिकाऱ्यांनी दिलेल्या माहितीनुसार, स्पाईसजेट SG670 हे मुंबईहून कोलकात्याकडे निघालं होतं. विमान कोलकात्याच्या जवळ पोहोचले असताना, वैमानिकाला विमानातील एका इंजिनमध्ये बिघाड झाल्याची तांत्रिक सूचना मिळाली. समस्या लक्षात येताच, वैमानिकाने तत्काळ कोलकात्याच्या एअर ट्रॅफिक कंट्रोल अधिकाऱ्यांना याची माहिती दिली आणि आपत्कालीन लँडिंगची मागणी केली. यानंतर, रात्री ११.३८ वाजता विमानाची सुरक्षित लँडिंग झाली आणि आपत्कालीन स्थिती पूर्णपणे काढून टाकण्यात आली.
advertisement
आपत्कालीन लँडिंगची सूचना मिळताच विमानतळ अधिकारी तातडीने सज्ज झाले. अग्निशमन दलाच्या गाड्या, रुग्णवाहिका आणि वैद्यकीय कर्मचाऱ्यांची टीम विमानतळावर तैनात करण्यात आली. कोणतीही विपरीत परिस्थिती निर्माण झाल्यास, तातडीने मदत पोहोचवण्यासाठी ही तयारी ठेवण्यात आली होती. मात्र, पायलटच्या कौशल्यामुळे आणि अधिकाऱ्यांच्या तत्परतेमुळे विमान सुरक्षित लॅण्ड करण्यात आलं.
मागील महिन्यातही घडली होती अशीच घटना
विमानाच्या तांत्रिक बिघाडाच्या अशा घटना आता सामान्य होत चालल्या आहेत. मागील महिन्यातच कोलकाता ते श्रीनगर जाणाऱ्या 'इंडिगो कंपनीच्या एका विमानाला इंधनाची गळती झाल्यामुळे उत्तर प्रदेशातील वाराणसी येथील लाल बहादूर शास्त्री आंतरराष्ट्रीय विमानतळावर आपत्कालीन लँडिंग करावी लागली होती. इंडिगोच्या त्या विमानामध्ये १६६ प्रवासी आणि कर्मचारी होते. त्यावेळीही सर्व प्रवाशांना सुरक्षित बाहेर काढण्यात आले होते. तांत्रिक पथकाने विमानाची तपासणी आणि दुरुस्ती केली होती.
प्रवाशांचा जीव टांगणीला
विमानांचे इंजिन बिघाड, इंधन गळती किंवा अन्य तांत्रिक अडचणींमुळे वारंवार होणाऱ्या आपत्कालीन लँडिंगच्या या घटना विमान प्रवाशांच्या मनात भीती निर्माण करणाऱ्या आहेत. विशेषत: जेव्हा एखादे विमान आपत्कालीन स्थितीत लँडिंगसाठी उतरते, तेव्हा विमानात बसलेल्या प्रवाशांचा जीव अक्षरशः टांगणीला लागलेला असतो. विमान कंपन्यांनी प्रवाशांच्या सुरक्षेसाठी तांत्रिक तपासणीचे नियम अधिक कठोर करणे, हाच या समस्येवरील खरा उपाय आहे.