संरक्षण सूत्रांनुसार, आज सकाळी 11 वाजण्याच्या सुमारास लष्कराच्या एरिया डोमिनेशन पार्टीला काही संशयास्पद हालचाली दिसल्या. त्यानंतर तात्काळ ही मोहीम सुरू करण्यात आली. जवरवान रिज आणि महादेव रिज यांच्या मधल्या परिसरात ही चकमक झाली.
सुरुवातीला तीनही दहशतवादी मारले गेल्याची शक्यता वर्तवण्यात आली होती, जी नंतर खरी ठरली. पोलिस सूत्रांनी दिलेल्या माहितीनुसार, तीन दहशतवाद्यांच्या हालचालीची माहिती मिळाली होती, ज्यात दोन मारले गेले आणि एक जखमी झाला होता. सुरक्षा पथके आता घटनास्थळी दाखल झाली असून, लवकरच परिस्थिती स्पष्ट होईल. सूत्रांकडून मिळालेल्या माहितीनुसार दहशतवाद्यांच्या मृतदेहांची ओळख पटवण्याची प्रक्रिया सुरू आहे.
advertisement
दहशतवाद्यांची ओळख पटवण्यासाठी ड्रोन फोटोग्राफीचा वापर केला जात आहे. या कारवाईमागे दोन दिवसांपूर्वी दाचीगाम जंगलात झालेल्या एका संशयास्पद संवादाची मुख्य भूमिका होती. या संवादानंतर जवानांना अलर्ट जारी करण्यात आला होता. गुप्तचर विभागाने दिलेल्या माहितीनंतर ही कारवाई करण्यात आली आणि ती यशस्वीरित्या पार पडली. सूत्रांकडून मिळालेल्या माहितीनुसार ऑपरेशन महादेवमध्ये लष्कर ए तोएबाचा कमांडर मुसा ठार झाला आहे.
या तिन्ही दहशतवाद्यांचा ऑपरेशन पहलगामशी थेट संबंध आहे की नाही याचा शोध घेतला जात आहे. यासोबत जवानांनी घटनास्थळावरुन स्फोटकं देखील जप्त केली आहेत. टीआरएफचे हे तिन्ही दहशतवादी होते अशी माहिती मिळाली आहे. या प्रकरणी पोलीस आणि जवानांकडून आणखी कोणती माहिती समोर येते ते पाहाणं महत्त्वाचं ठरणार आहे.