दूध न घेणाऱ्या डेअरीने पुरवले ६८ लाख किलो तूप
या घोटाळ्यातील सर्वात मोठा आणि धक्कादायक खुलासा समोर आला. उत्तराखंडमधील एका डेअरीने ५ वर्षांच्या कालावधीत TTD ला ६८ लाख किलोग्राम तुपाचा पुरवठा केला, ज्याची किंमत अंदाजे २५० कोटी रुपये आहे. CBI च्या तपासात, या डेअरीने कधीही दूध किंवा लोण्याचा एक थेंबही कुठूनही खरेदी केला नव्हता.
advertisement
मग तूप कुठून आणि कसं दिलं? ज्या संस्थेने कधी दूध-लोणी खरेदी केले नाही, त्यांनी ५ वर्षांत एवढ्या मोठ्या प्रमाणात तुपाचा पुरवठा TTD ला कसा केला, हा सर्वात मोठा प्रश्न आहे. TTD मध्ये या करोडो रुपयांच्या महाघोटाळ्याची वेळेत नोंद घेणारी कोणतीही व्यवस्था नव्हती का, असा सवाल भक्त आणि यंत्रणा विचारत आहेत.
तुपात भेसळ आणि जनावरांची चरबी
हे तूप केवळ निकृष्ट दर्जाचंच नाही, तर त्यात मोठ्या प्रमाणात भेसळ करण्यात आली होती. डेअरीचे प्रमोटर्स पामिल जैन आणि विपिन जैन यांनी बनावट देसी तूप उत्पादन युनिट उभे केलं. त्यांनी दूध आणि लोणी खरेदीची बनावट कागदपत्रे तयार केली. तपासात आरोपी अजय कुमार सुगंध याने SIT ला सांगितले की, तो डेअरीला मोनोडायग्लिसराइड्स आणि एसेटिक ॲसिड एस्टर यांसारखी रसायने पुरवत असे.
हे पदार्थ तुपामध्ये बनावट पोत आणण्यासाठी वापरले जात होते. CBI च्या रिमांड रिपोर्टमध्ये आणखी गंभीर खुलासा झाला आहे की, तुपाच्या अनेक स्टॉकची निर्मिती जनावरांची चरबी मिसळून करण्यात आली होती. भ्रष्टाचार आणि निकृष्ट मालाच्या तक्रारीनंतर TTD ने २०२२ मध्ये ‘भोले बाबा डेअरी’ला ब्लॅकलिस्ट केले होते. मात्र, या डेअरी मालकांनी आपले कारनामे थांबवले नाहीत.
ब्लॅकलिस्ट झाल्यानंतरही डेअरी मालकांनी अन्य तीन फर्म्सच्या नावावर निविदा मिळवून तुपाचा पुरवठा चालू ठेवला. यामध्ये वैष्णवी डेअरी (तिरुपती), माल गंगा डेअरी (उत्तर प्रदेश) आणि ए.आर. डेअरी फूड्स यांचा समावेश आहे. जुलै २०२४ मध्ये TTD ने 'ए.आर. डेअरी' कडून आलेले तुपाचे चार टँकर भेसळीमुळे नाकारले होते. मात्र, हे टँकर डेअरी प्लांटमध्ये परत न जाता, त्यांना थेट वैष्णवी डेअरीकडे पाठवण्यात आले.
हा कोट्यवधी रुपयांचा घोटाळा उघडकीस आल्याने देशभरातील भाविकांमध्ये संतापाची लाट उसळली आहे. तिरुपती मंदिरासारख्या पवित्र ठिकाणी प्रसादात अशी भेसळ होणे, हा धार्मिक भावनांशी खेळ असल्याचा आरोप केला जात आहे.