पार्थिवापुढे नाचत निरोप द्या
व्हायरल होत असलेला हा व्हिडीओ मंदसौर जिल्ह्यातील जवासिया गावातील आहे. येथे राहणारे सोहनलाल जैन यांचे 29 जुलै रोजी निधन झाले. विशेष म्हणजे, 2021 मध्येच सोहनलाल यांनी एक भावनिक पत्र लिहून त्यांचे दोन जवळचे मित्र, अंबालाल प्रजापती आणि शंकरलाल पाटीदार यांना एक विशेष विनंती केली होती. या पत्रात सोहनलाल यांनी म्हटले होते की, त्यांच्या निधनानंतर त्यांच्या अंत्ययात्रेत कोणीही रडू नये, उलट, त्यांच्या पार्थिवापुढे नाचत त्यांना निरोप द्यावा. सोहनलाल जैन यांनी पत्रात आपल्या मित्रांची माफी मागताना काही चूक झाली असल्यास क्षमा करावी, अशी विनंती देखील केली आहे.
advertisement
मी मेलो तर रडू नको...
सोहनलाल जैन यांच्या या भावनिक विनंतीचा मान राखत, 30 जुलै रोजी त्यांच्या अंत्ययात्रेत त्यांचे मित्र अंबालाल प्रजापती यांनी सोहनलाल यांची अंतिम इच्छा पूर्ण केली. त्यांनी अंत्ययात्रेच्या पुढे नाचत आपल्या मित्राला निरोप दिला. हा क्षण पाहून तिथे उपस्थित असलेले प्रत्येक जण भावुक झाले होते. मित्र प्रजापती म्हणाले, "सोहनलाल मला अनेकदा सांगायचे की जर मी मेलो तर रडू नको. माझ्या शेवटच्या प्रवासात नाच. मी माझ्या मित्राच्या शेवटच्या प्रवासात त्याच्या इच्छेनुसार नाचलो." तो भावनिकपणे म्हणाला, "मला मैत्री जपायची होती आणि मी ती शेवटपर्यंत जपली."
मृत्यूनंतरही जपली मैत्री
दरम्यान, हा केवळ एक डान्स नव्हता, तर एका अतूट मैत्रीचे, वचनाचे आणि मृत्यूनंतरही जपलेल्या नात्याचे प्रतीक होते. सोहनलाल जैन यांच्या मृत्यूनंतर शोक व्यक्त करण्याऐवजी, त्यांच्या मित्रांनी त्यांना आनंद आणि संगीताने निरोप देऊन एक अविस्मरणीय उदाहरण दिलं आहे.