Soyabean Rate Today : सोयाबीनची आवक वाढली, दरात पुन्हा तेजी, सध्याचे बाजारभाव काय?

राज्यातील सोयाबीन बाजारात मोठा चढ-उतार पाहायला मिळाला आहे. पिवळ्या सोयाबीनला राज्यभरात सर्वाधिक मागणी दिसून आली आहे. अनेक बाजारांमध्ये दरात तेजी होती, तर काही ठिकाणी आवक कमी राहिली. सर्वात जास्त लक्ष वेधून घेतले ते वाशीम बाजारसमितीमध्ये सोयाबीनला तब्बल 6,035 प्रति क्विंटल इतका दर मिळाला.

25 नोव्हेंबर रोजी राज्यभरात एकूण सोयाबीन आवक 71,124 क्विंटल इतकी झाली. बहुतेक बाजारात आवक मध्यम ते जास्त प्रमाणात होती. पिवळ्या सोयाबीनला व्यापाऱ्यांची विशेष पसंती मिळत असल्याने या जातीचे दर अनेक बाजारात 4,400 ते 5,100 रुपयांच्या दरम्यान स्थिर होते. तर लोकल व मिक्स सोयाबीनला तुलनेने कमी प्रतिसाद मिळाला.

पिवळ्या सोयाबीनच्या खरेदीमध्ये वाढ - अकोला, मेहकर, चिखली, उमरेड, उमरखेड, बीड, यवतमाळ या बाजारांमध्ये पिवळ्या सोयाबीनची मागणी वाढताना दिसली. व्यापाऱ्यांनी सकाळपासून विक्रमी खरेदी केली. ज्याचा भावावर सकारात्मक परिणाम दिसून आला. विशेष म्हणजे, सोलापूर, अमरावती आणि नागपूर बाजारांमध्ये लोकल सोयाबीनची आवक जास्त होती, पण भाव मात्र मध्यम पातळीवर राहिले.

लातूरमध्ये सर्वाधिक आवक -  लातूर बाजारात सर्वाधिक म्हणजे 23,548 क्विंटल इतकी आवक झाली. कारंजा येथे 9,500 क्विंटल, तर रिसोड येथे 3,439 क्विंटल इतकी आवक नोंदली गेली. अमरावती, अकोला आणि मंगरुळपीर बाजार समितीमध्ये आवक चांगली वाढली असून या पिवळ्या सोयाबीनची खरेदी जास्त झाली.

छत्रपती संभाजीनगरमध्ये फक्त 24 क्विंटल इतकी आवक झाली. राहूरी-वांबोरी येथे 11 क्विंटल, पैठणमध्ये 19 क्विंटल तर गंगापूरमध्ये तर केवळ 2 क्विंटल सोयाबीन आले. तुळजापूरमध्येही आवक फक्त 125 क्विंटल नोंदली गेली. कमी आवक असूनही काही बाजारात दर 4,500 रुपयांच्या आसपास स्थिर राहिले.