Maruti Wagon R ची येतेय छोटी 'ताई', Suzuki ने दाखवली नव्या कारची झलक; लूक पाहून पडाल प्रेमात!

भारतातील सर्वात मोठी कार उत्पादक कंपनी असलेल्या Maruti Suzuki ने भारतीय मार्केटवर कब्जा केला आहे. सर्वसामान्यांसाठी स्वस्त आणि मायलेजदार कारचं उत्पादन करणारी Maruti Suzuki आता ईलेक्ट्रिक कारचं उत्पादन सुरू केलं आहे. पहिली ईलेक्ट्रिक कार व्हिटारा लाँचही करण्यात आली आहे. आता त्यानंतर Suzuki ने आपली छोटी आणि कॉम्पॅक्ट अशी ईव्ही कारची झलक दाखवली आहे.  जपान मोबिलिटी शो 2025 च्याआधीच  सुझुकी मोटर कॉर्पोरेशनने कॉम्पॅक्ट इलेक्ट्रिक व्हेईकल (EV)  'Vision e-Sky' जगासमोर आणली आहे. 

ही एक 'बॉर्न-ईव्ही' कन्सेप्ट कार आहे. जी सुझुकीच्या नवीन डिझाइन "Unique, Smart, Positive" अंतर्गत तयार केली आहे. या कारची 'टॉल-बॉय' स्टाईलिंग भारतात विकल्या जाणाऱ्या मारुती वॅगनआर WagonR ची आठवण करून देते आणि भविष्यातील एंट्री-लेव्हल इलेक्ट्रिक मोबिलिटी कशी असू शकते, याचा संकेत देत आहे.

डिझाइन - Suzuki Vision e-Sky ला हटके असा लूक दिला आहे. या कारच्या फ्रंटवर मॅट्रिक्स-स्टाईलची LED लाईट बार आहे, ज्याच्या दोन्ही बाजूंना C-आकाराचे DRLs डेटाइम रनिंग लाईट्स आणि मुख्य हेडलाईट्स आहेत. याची रचना सरळ-उभी आहे, ज्यामुळे आत बसलेल्यांना अधिक हेडरूम मिळेल. बाजूला फ्लश डोअर हँडल्स, एरोडायनॅमिक विंग मिरर्स आणि एक फ्लोटिंग C-पिलर याला आधुनिक स्पर्श देतात.

Vision e-Sky  ची लांबी 3,395mm, रुंदी 1,475mm आणि उंची 1,625mm इतकी आहे.  विशेष म्हणजे, या Vision e-Sky  ची  उंची ही Maruti Suzuki S-Presso पेक्षा जास्त आहे. पण लांबी आणि रुंदीमध्ये एस-प्रेसोपेक्षा लहान आहे. तिचा हा कॉम्पॅक्ट आकार जपानच्या 'केई कार (Kei car)' नियमांनुसार आहे, ज्यामुळे ती भारतासारख्या गर्दीच्या शहरांसाठी देखील एक बेस्ट ऑप्शन बनू शकतो.

Vision e-Sky मध्ये आतमध्येही उत्तम असं इंटिरियर केलं आहे.  या Vision e-Sky  मध्.े 'स्क्विरकल' चौकोनी आकाराचे स्टीअरिंग व्हील आहे, ज्यावर मल्टी-फंक्शन बटणं दिली आहेत. ड्रायव्हरसाठी दोन डिजिटल स्क्रीन आहेत. एक इन्स्ट्रुमेंट क्लस्टरसाठी जी बॅटरी चार्ज, रेंज आणि स्पीड (गती) यासारखी माहिती दर्शवते आमि दुसरी इन्फोटेनमेंटसाठी.  यात फ्लोटिंग डॅशबोर्ड डिझाइन आहे.

Vision e-Sky  मध्ये  LED लाईट स्ट्रिप्स संपूर्ण केबिनमध्ये एम्बिएंट लाईटिंग दिली आहे. ड्राईव्ह सिलेक्टर डॅशबोर्डच्या खाली स्थित आहे.  फ्रंट सीट्स स्प्लिट-टाईप डिझाइनच्या आहेत, ज्यामुळे प्रीमियम असा अनुभव येतो.

लाँच कधी होणार?  Vision e-Sky  मॉडेलची ही झलक आहे, प्रोडक्शन मॉडेल हे  2026 मध्ये लाँच होण्याची शक्यता आहे. कंपनीने या गाडीबद्दल अधिकृत अशी माहिती दिली नाही, पण असं सांगितलं जातंय की, या कारची रेंजही 270 किमी पेक्षा जास्त असण्याची शक्यता आहे. शहरी भागात फिरण्यासाठी हा एक बेस्ट ऑप्शन असणार आहे. 

भारतात कधी लाँच होणार? Vision e-Sky  ही एक कन्सेप्ट एंट्री-लेव्हल कार आहे. मारुती इलेक्ट्रिक ही कार भारतात लाँच करू शकते अशी शक्यता आहे. कारण, भारतात या साईजमध्ये आधीच Tata Tiago EV आणि MG Comet EV गाड्या आहेत. या कंपन्यांना टक्कर देण्यासाठी मारुती ही कार 2026-27 च्या आसपास भारतात लाँच करू शकते. जर ही कार भारतात लाँच झाली तर भारतातील सर्वात परवडणाऱ्या EV पैकी एक बनू शकते.