90s ची हिट हिरोईन, जिच्या प्रेमात क्लिन बोल्ड झाला अंडरवर्ल्ड डॉन दाऊद इब्राहिम, अभिनेत्रीसाठी प्रोड्यूसरला संपवलं

अंडरवर्ल्ड म्हटलं की कोणालाही दरदरून घाम फुटेल. अंडरवर्ल्डशी संबंध म्हणजे मृत्युला आमंत्रण. मात्र एक काळ असा होता की या अंडरवर्ल्डच्या भीतीमुळे बॉलिवूड कलाकारांचा जीव टांगणीला लागला होता. 80-90 च्या दशकात हिंदी सिनेसृष्टीवर अंडरवर्ल्डचे सावट होते, यामुळे प्रत्येकजण चिंतेत होता. टी-सीरिजचे मालक गुलशन कुमार यांना आपला जीव गमवावा लागला होता. तर राकेश रोशन यांच्यावरही गोळीबार करण्यात आला होता.

90 च्या दशकात अशा बातम्या समोर येत होत्या की अंडरवर्ल्डचे लोक बॉलिवूड सिनेमांवर पैसे लावायचे. इतकंच नाही, तर ते त्यांच्या जवळच्या संपर्कात राहणाऱ्या अभिनेत्रींना चित्रपटात कास्ट करण्यासाठी निर्माते आणि दिग्दर्शकांवर दबाव टाकत असत. अंडरवर्ल्डमधील असं एक सर्वांत चर्चेत असलेलं नाव म्हणजे दाऊद इब्राहिम. त्या काळात अनेक अभिनेत्रींसोबत त्याच्या लिंकअपच्या बातम्या होत्या. या अभिनेत्रींमध्ये 'राम तेरी गंगा मैली'ची 'मंदाकिनी', ममता कुलकर्णी अशा अनेक अभिनेत्रींचा समावेश होता. मात्र एक अभिनेत्री अशी होती, जिच्यामुळे एका निर्मात्याचा बळी गेला.

ही अभिनेत्री आहे अनिता आयुब. मूळची कराची, पाकिस्तानची असलेली अनिता 1987 मध्ये ‘गर्दिश’ या पाकिस्तानी टीव्ही मालिकेतून अभिनयात पदार्पण केल्यानंतर ती तिकडच्या शोजमध्ये लोकप्रिय झाली. पण तिला बॉलिवूडमध्ये प्रसिद्ध व्हायचं होतं. तिचं हे स्वप्न देवानंद यांच्यामुळे खरं झालं.

1993 साली 'प्यार का तराना' या चित्रपटात देवानंद यांनी तिला संधी दिली. तो चित्रपट विशेष चालला नाही, पण तिचं सौंदर्य आणि मादक अभिनय लक्षवेधी ठरला. तिने त्यानंतर काही प्रादेशिक चित्रपटही केले, पण 1995 मध्ये, जेव्हा तिचं नाव दाऊद इब्राहिमशी जोडलं गेलं, तेव्हा तिच्या नावाची खरी चर्चा सुरू झाली.

'प्यार का तराना' या चित्रपटानंतर तिने उर्दूमधील 'सब का बाप', पंजाबीमधील 'चलती का नाम गाडी' आणि मारियामध्ये काम केले. यानंतर, अभिनेत्रीला पुन्हा एकदा १९९५ मध्ये 'गँगस्टर' चित्रपटात ज्येष्ठ अभिनेते देव आनंद यांच्यासोबत काम करण्याची संधी मिळाली. 'गँगस्टर' बॉक्स ऑफिसवर फ्लॉप झाला आणि अनिता आयुबची बॉलिवूडमधील कारकीर्द अवघ्या २ वर्षातच संपली. तथापि, अनिता एका कारणामुळे चर्चेत आली आणि ती म्हणजे दाऊद इब्राहिमसोबतची तिची प्रेमकहाणी.

अनिता आयुबने दाऊदसोबतच्या तिच्या नात्याची कधीच कबुली दिली नाही, परंतु ई-टाईम्समधील वृत्तानुसार, अनितामुळे एका बॉलिवूड निर्मात्याला आपला जीव गमवावा लागला. १९९५ मध्ये निर्माते जावेद सिद्दीकी यांनी त्यांच्या बॉलिवूड चित्रपटात अनिता आयुबला कास्ट करण्यास नकार दिला होता, परिणामी दाऊदच्या एका माणसाने निर्मात्याची दिवसाढवळ्या गोळ्या घालून हत्या केली. जावेद सिद्दीकीच्या हत्येनंतर, इंडस्ट्रीतील अनेकांनी असा अंदाज लावला की ही अभिनेत्री दाऊदशी संबंधित आहे.

त्या काळी एका पाकिस्तानी मॅगझिनमध्ये दावा केला गेला होता की, अनिता ही पाकिस्तानची गुप्तहेर आहे. एकीकडे अंडरवर्ल्डशी तिचं कथित नातं, आणि दुसरीकडे गुप्तहेर असल्याच्या अफवा, यामुळे इंडस्ट्रीत तिच्यावर बहिष्कार घालण्यात आला.

'गँगस्टर' हा तिचा शेवटचा चित्रपट ठरला. आणि त्यानंतर अनिता आयुब मुंबईहून कायमची गायब झाली. काही काळातच ती अमेरिकेला गेली. तिने एका बिझनेसमनशी लग्न केलं आणि सध्या ती न्यूयॉर्कमध्ये स्थायिक आहे.