Watermelon: रंगाला भुलाल तर आरोग्याला मुकाल, कलिंगड खरेदीपूर्वी लक्षात ठेवा 5 टिप्स

उन्हाळा सुरू झाला की लालभडक, रसाळ कलिंगड आवर्जून बाजारातून आणलं जातं. कलिंगड खायला सर्वांना आवडतं. ते अत्यंत आरोग्यदायी देखील आहे. परंतु, बऱ्याचदा कलिंगड खाल्ल्यावर आजारी पडल्याचेही प्रकार घडतात.

बाजारात काही व्यापारी कलिंगडांना अधिक आकर्षक दिसण्यासाठी कृत्रिम रंग व रसायने वापरत असल्याचे समोर आलं आहे. त्यामुळे गोडसर, ताजेतवाने वाटणारे फळ खरंच आरोग्यासाठी सुरक्षित आहे का? याची तपासणी करणं गरजेचं आहे.

कलिंगड खरेदी करताना नैसगिर्करित्या पिकवलेलं कलिंगड ओळखण्यासाठी काही सोप्या टिप्स आज आपण पाहुयात.

फळाचा तळभाग तपासा – नैसर्गिक कलिंगडाचा तळभाग किंचित पिवळसर असतो. तर संपूर्ण एकसंध रंगाचे कलिंगड कृत्रिमरित्या पिकवलेले असण्याची शक्यता असते.

पाण्यात टाका – कलिंगडाचा लहानसा तुकडा पाण्यात टाकल्यास पाणी गुलाबीसर होते का हे पाहा. पाणी रंगाळल्यास त्यावर कृत्रिम रंग लावलेला असतो.

बियांचा रंग – नैसर्गिक कलिंगडाच्या बिया तपकिरी किंवा काळसर असतात, तर कृत्रिमरित्या रंगवलेल्या कलिंगडाच्या बिया पांढऱ्या रंगाच्या असतात.

आतला रंग आणि स्पर्श – नैसर्गिक कलिंगडाचे गर लालसर पण नैसर्गिक दिसते, तर रासायनिक कलिंगड अतिशय गडद लालसर असते आणि कधी कधी रंग हातालाही लागतो.

आरोग्य धोका – रसायनयुक्त कलिंगड खाल्ल्याने अन्नविषबाधा, पचनसंस्थेच्या तक्रारी आणि गंभीर आरोग्यविषयक धोके संभवतात.

सजग राहा, स्वास्थ्य जपा – कलिंगड खरेदी करताना आकर्षक रंगाला भुलू नका, योग्य तपासणी करूनच नैसर्गिक व सुरक्षित फळांची निवड करा.