Free Treatment: खरा देवदूत, गरीब रुग्णांसाठी देतोय मोफत उपचार, काय आहे उपक्रम?

छत्रपती संभाजीनगर जिल्ह्यातील कन्नड तालुक्यातील नाचनवेल गावात एक अनोखा आणि प्रेरणादायी उपक्रम सुरू करण्यात आला आहे. येथील वैद्यकीय तज्ज्ञ डॉ. नवनाथ दहीहंडे यांनी आजी-माजी सैनिक, शहीद जवानांचे कुटुंबीय, पोलीस बांधव तसेच आर्थिक अडचणीत असलेल्या गरीब रुग्णांसाठी जीवनभर मोफत उपचार देण्याचा संकल्प केला आहे.

देशासाठी बलिदान देणाऱ्या आणि जनतेच्या सुरक्षेसाठी आयुष्य झोकून देणाऱ्या या वीरांना आणि त्यांच्या कुटुंबीयांना वैद्यकीय मदत करून आपले ऋण फेडण्याचा प्रयत्न या उपक्रमातून केला जात आहे.

डॉ. दहीहंडे यांच्या कार्याला त्यांच्या पत्नी डॉ. देवयानी दहीहंडे या स्त्रीरोग तज्ज्ञांचा मोठा हातभार लाभला आहे. महिलांच्या आरोग्यविषयक समस्या, विशेषतः गर्भधारणेच्या काळात लागणारे नऊ महिन्यांचे उपचार, तपासण्या आणि खर्चिक औषधोपचार हे सर्व सेवा मोफत उपलब्ध करून दिल्या जात आहेत.

इतकेच नाही तर रुग्णांना आवश्यक त्या गोळ्या, औषधे यावर सूट मिळते. रक्त तपासणी, लघवी तपासणीसह विविध वैद्यकीय चाचण्या देखील कमी दरात रुग्णांसाठी उपलब्ध करून दिल्या जात असल्याचे दहीहंडे यांनी लोकल 18 शी बोलताना सांगितले.

देशासाठी काहीतरी देण्याची भावना मनात बाळगून डॉ. दहीहंडे यांनी गेल्या 15 ऑगस्टपासून या सेवेला सुरुवात केली. अल्पावधीतच 15 ते 20 रुग्णांनी या उपक्रमाचा लाभ घेतला असून त्यांना उपचार आणि तपासण्या पूर्णपणे मोफत मिळाल्या आहेत. त्यामुळे या वैद्यकीय उपक्रमाला समाजाकडून मोठा प्रतिसाद मिळू लागला आहे.

गरीब रुग्णांच्या डोळ्यांत दिलासा, शहीद आणि सैनिक कुटुंबीयांच्या मनात आदर, आणि पोलीस बांधवांच्या चेहऱ्यावर समाधान या उपक्रमामुळे दिसून येत आहे. लोकप्रतिनिधींपासून स्थानिक ग्रामस्थांपर्यंत सर्वांनीच डॉ. दहीहंडे यांच्या सेवाभावी कार्याचे कौतुक केले आहे.

सामाजिक बांधिलकी जोपासत देशसेवेतून समाजसेवेपर्यंतचा प्रवास करताना दहीहंडे दाम्पत्याने एक आदर्श निर्माण केला आहे.