Interesting Facts : एकमेव देश जिथे पुरुषांपेक्षा महिलांना मिळतो जास्त पगार! कामाचे तासही असतात लवचिक..

जगभरातील महिला गेल्या अनेक वर्षांपासून कामकाजाच्या क्षेत्रात पुढे येत आहेत, तरीही बहुतेक देशांमध्ये महिलांना पुरुषांपेक्षा कमी वेतन दिले जाते. विकसित देशांमध्येही हा फरक आजही कायम आहे. मात्र युरोपमधील एक देश याबाबतीत पूर्णपणे वेगळा ठरतो.

युरोपमधील लक्झेंबर्ग हा एकमेव असा देश आहे, जिथे केवळ चांगल्या नोकरीच्या संधी आणि करिअरमध्ये प्रगतीच मिळत नाही, तर सरासरीने महिलांना पुरुषांपेक्षा थोडा अधिक पगारही दिला जातो. या छोट्याशा देशाने लैंगिक वेतन समानता साध्य केली आहे आणि येथे महिलांच्या कर्तृत्वाला सन्मान दिला जातो.

लक्झेंबर्गमध्ये जेंडर पे गॅप सुमारे -0.7 टक्के आहे, म्हणजेच महिलांचे उत्पन्न पुरुषांपेक्षा किंचित जास्त आहे. ही परिस्थिती केवळ युरोपमध्येच नव्हे, तर संपूर्ण जगातच दुर्मिळ मानली जाते.

गेल्या 50 वर्षांत लक्झेंबर्गमध्ये काम करणाऱ्या महिलांची संख्या लक्षणीयरीत्या वाढली आहे. आज महिला शिक्षण, आरोग्य, वित्त, तंत्रज्ञान अशा जवळपास प्रत्येक क्षेत्रात कार्यरत आहेत. अनेक महिला सरकारी क्षेत्रातही आपली सेवा देत आहेत.

लक्झेंबर्ग सरकार महिला आणि पुरुषांमधील समानतेला प्रोत्साहन देते. येथे पालकांसाठी दीर्घ रजा, लवचिक कामाचे तास आणि वेतनातील पारदर्शकता यांसारखे नियम आहेत, ज्यामुळे महिलांना पुढे जाण्यास मदत होते.

लक्झेंबर्ग हा युरोपमधील सर्वात लहान देशांपैकी एक आहे. त्याच्या चारही बाजूंना बेल्जियम, फ्रान्स आणि जर्मनी हे देश आहेत. लक्झेंबर्ग सिटी ही त्याची राजधानी असून तीच देशातील सर्वात मोठे शहर आहे.

लक्झेंबबर्ग हा जगातील एकमेव ग्रँड डची राजेशाही देश आहे. येथे ग्रँड ड्यूक हे देशाचे प्रमुख असतात, तर पंतप्रधान सरकार चालवतात. हा एक संसदीय लोकशाही देश असून राजकीयदृष्ट्या स्थिर आहे. लक्झेंबर्ग हा युरोपियन युनियनचा संस्थापक सदस्य असून येथे अनेक युरोपीय संस्था आहेत.

लक्झेंबर्ग हा युरोपमधील सर्वात श्रीमंत देशांपैकी एक असून येथे प्रति व्यक्ती उत्पन्न खूप जास्त आहे. येथील अर्थव्यवस्था मुख्यतः सेवा क्षेत्रावर आधारित आहे, जसे की बँकिंग, वित्त, आयटी, लॉजिस्टिक्स आणि कॉर्पोरेट सेवा. पूर्वी येथे स्टील आणि खाण उद्योग होते, मात्र आता आधुनिक क्षेत्रांचे वर्चस्व आहे. जरी येथे लोकांचे वेतन खूप जास्त असले, तरी राहणीमानाचा खर्चही तितकाच जास्त आहे.

Disclaimer : या बातमीत दिलेली माहिती आणि सल्ला तज्ञांशी झालेल्या संभाषणांवर आधारित आहे. ही सामान्य माहिती आहे, वैयक्तिक सल्ला नाही. म्हणून कोणत्याही सल्ल्याचे अनुसरण करताना तज्ज्ञांचा सल्ला घ्यावा. कोणतेही नुकसान झाल्यास त्यासाठी न्यूज-18 जबाबदार राहणार नाही.