Mango Benefits : मधुमेह असणाऱ्या रुग्णांनी आंबा खावा का, प्रमाण किती असावं?

आंब्यामध्ये व्हिटॅमिन सी, फायबर, पोटॅशियम यांसारखे अनेक पोषक घटक असतात. जे तुमच्या आरोग्यासाठी फायदेशीर आहेत. परंतु यामध्ये असणाऱ्या नैसर्गिक शुगरमुळे तो योग्य प्रमाणात खाणं केव्हाही चांगले. चला तर, आंबे खाण्याचे फायदे काय? दिवसातून किती आंबे खावेत? मधुमेहाचे रुग्ण आंबा खाऊ शकतात का? याबाबत आज जाणून घेऊ.

आंब्यामध्ये असणारी नैसर्गिक साखर ही नेहमीच्या साखरेपेक्षा आरोग्यासाठी कमी हानिकारक आहे. मात्र, शुगर किंवा मधुमेह असणाऱ्या रुग्णांनी आंबा अतिशय योग्य प्रमाणात खावा. विशेषत: ज्यांची शुगर लेव्हल हाय असते, त्यांनी आंबा खाताना काळजी घ्यावी. मधुमेह असणाऱ्या रुग्णांना आंबा खाण्यास मनाई नाही, पण तो खाण्याचं प्रमाण योग्य हवे. तुम्ही आंबा चिरून त्याच्या फोडी खाऊ शकता. मात्र, मँगो शेक किंवा ज्यूस पिणं टाळा.

आंबा खाणे निरोगी व्यक्तीसाठी आरोग्याच्यादृष्टिनं फायदेशीर आहे. पण त्यामध्ये शुगरसोबतच भरपूर कॅलरीज असतात. त्यामुळे तो खाणं फायदेशीर ठरू शकते. पण तरीही तुम्ही दिवसातून एक ते दोन आंबे खाणं योग्य आहे. शक्यतो एका आंब्याचे दोन भाग करून तो हळूहळू खाल्यास अधिक फायदा होईल.

आंब्यामध्ये पोटॅशियम भरपूर असते, जे हृदयाच्या आरोग्यासाठी चांगलं मानलं जाते. पोटॅशियम हृदयाचे ठोके व तुमचा रक्तदाब नियंत्रणात ठेवण्यास मदत करते. डोळ्यांच्या आरोग्यासाठीही आंबा उत्कृष्ट मानला जातो. आंब्यात बीटा कॅरोटीन मुबलक प्रमाणात असते. जे डोळ्यांसाठी चांगले असते. डोळ्यांशी संबंधित फायदे देते. रोगांपासून डोळांचा बचाव करते.

आंब्यामध्ये फायबर असते, जे पचनसमस्या दूर करण्यासाठी उपयुक्त ठरते. बद्धकोष्ठता, अपचन इत्यादींवर आंब्याचे सेवन गुणकारी मानलं जातं. मात्र, जास्त आंबा खाल्ल्यानं तुमचं पचन बिघडू शकते.

आंब्यामध्ये व्हिटॅमिन सी आणि अँटीऑक्सिडंट्स मुबलक प्रमाणात आढळतात. ज्यामुळे तुमच्या शरीराची रोग प्रतिकारशक्ती वाढवण्यास मदत होते. आंबा खाल्यानं विविध आजारांचा धोका कमी होतो. दरम्यान, आंबा हा आरोग्याच्यादृष्टिनं फायदेशीर असला तरी तो खाण्याचे प्रमाण योग्य हवे.