अहमदनगरमध्ये राडा, आधी विखेंच्या समर्थकांना मारहाण, नंतर लंकेच्या पीएवर हल्ला; फोटो आले समोर

लोकसभा निवडणुकीत अहमदनगरमध्ये सुजय विखे पाटील यांचा पराभव करून राष्ट्रवादी काँग्रेस शरदचंद्र पवार पक्षाचे उमेवार निलेश लंके हे जायंट किलर ठरले. निकालानंतर आता दोन दिवसांनी अहमदनगरमध्ये मोठा राडा झाला आहे. यात निलेश लंके यांच्या जवळच्या माणसावर सुजय विखे पाटील समर्थकांकडून प्राणघातक हल्ला झालाय.

खासदार निलेश लंके यांचा सहकारी राहुल झावरे याच्यावर प्राणघातक हल्ला झाल्याची माहिती समोर आलीय. यामुळे खळबळ उडालीय. राहुल झावरे यांना रुग्णालयात दाखल केलं असून त्यांच्यावर  उपचार केले जात आहेत.

सुजय विखे पाटील आणि निलेश लंके समर्थकांमध्ये आधी झालेल्या वादानंतर हा हल्ला झाला आहे. राहुल झावरे हे निलेश लंके यांचे जवळचे सहकारी असून त्यांना गंभीर जखमी अवस्थेत रुग्णालयात दाखल केलं आहे. झावरे यांची गाडी फोडण्यात आली आहे.

पारनेर तालुक्यातल्या गोरेगावमध्ये खासदार लंके समर्थकांनी माजी खासदार सुजय विखे पाटील समर्थकांना मारहाणीची माहिती समोर आली होती. त्यानंतर पारनेर बसस्थानकावर लंके समर्थकांवर हल्ला करण्यात आला असं समजते.

अहमदनगर नगर दक्षिण लोकसभा मतदारसंघांमध्ये राष्ट्रवादी काँग्रेस शरद पवार पक्षाचे उमेदवार निलेश लंके हे 28 हजार 929 मतांनी निवडून आले आहेत. त्यांनी भाजपाचे उमेदवार माजी खासदार सुजय विखे यांचा पराभव केला.