Weather Alert: मराठवाड्यात सतर्कतेचा इशारा, आज धो धो पाऊस नाही, आता वेगळंच कारण!

राज्यातील पावसाचा जोर आता ओसरू लागला आहे. मराठवाड्यात देखील पाऊस कमी झाला असून हवामानात मोठे बदल जाणवत आहेत. आज हवामान ढगाळ राहणार असले तरी मोठ्या पावसाची शक्यता नाही. त्यामुळे नागरिकांना काहीसा दिलासा मिळणार आहे. पुढील 24 तासांचा हवामान अंदाज जाणून घेऊ.

छत्रपती संभाजीनगरसह आठही जिल्ह्यांना हवामान विभागाने आज कुठलाही 'सतर्कतेचा अलर्ट' दिलेला नाही. त्यामुळे आज 22 ऑगस्ट रोजी छत्रपती संभाजीनगरमध्ये साधारणपणे ढगाळ वातावरण राहणार असून हलका पाऊस होण्याची शक्यता आहे. यावेळी कमाल तापमान 29 अंश सेल्सिअस तर किमान तापमान 22 अंश सेल्सिअस एवढे असेल.

मराठवाड्यातील छ. संभाजीनगरसह जालना, परभणी, बीड, हिंगोली, नांदेड, लातूर आणि धाराशिव या आठही जिल्ह्यांत सामान्यत: ढगाळ वातावरण राहणार असून हलक्या पावसाची शक्यता आहे. यावेळी काही ठिकाणी ढगांचा गडगडाट देखील होऊ शकतो.

जायकवाडी धरणाचा साठा जवळपास 96 टक्क्यांवर पोहोचला आहे. धरणात 2 हजार 603 क्युसेकने पाण्याची आवक सुरू आहे. वाढती आवक पाहता गुरूवारी सकाळी मुख्य 18 दरवाजांमधून अर्ध्या फुटाने गोदावरी नदीच्या पात्रात 9 हजार 432 क्युसेकने पाण्याचा विसर्ग सोडण्यात आला. त्यामुळे धरण आणि नदीकाठच्या गावांना सतर्कतेचा इशारा देण्यात आला आहे.

मागील आठ दिवसात मराठवाड्यातील काही जिल्ह्यात ढगफुटी सदृश, तर काही जिल्ह्यात मुसळधार पाऊस झाला. त्यामुळे शेतकऱ्यांचे मोठे नुकसान झाले. शेतकऱ्यांची उभी पिके आडवी झाली आहेत. तसेच शेतकऱ्यांच्या फळबागांना देखील मोठा फटका बसला आहे. आता मात्र पावसाचा जोर ओसरला असून पुढील काही काळ हवामानाची हीच स्थिती कायम राहणार आहे.