Weather Alert: 24 तास पावसाचे, 31 ऑगस्टला धो धो कोसळणार, मराठवाड्यात पुन्हा अलर्ट

राज्यात काही ठिकाणी पावसाचा जोर वाढला आहे. विदर्भ आणि मराठवाड्यात देखील पावसाची तीव्रता वाढल्याचे चित्र आहे. आज 31 ऑगस्ट रोजी मराठवाड्यातील 3 जिल्ह्यांत वादळी वारा आणि विजांसह जोरदार पावसाची शक्यता आहे. हवामान विभागाने पुढील 24 तासांसाठी काही भागात यलो अलर्ट जारी केला आहे.

मराठवाड्यात ऑगस्ट महिन्यात जोरदार पावसाने हजेरी लावली. जोरदार पावसामुळे शेतकऱ्यांचे पिकांचे मोठ्या प्रमाणात नुकसान झाले. आता देखील हवामानात काही बदल होत असल्याने पावसाचे कमी - अधिक प्रमाण होत आहे. आज छत्रपती संभाजीनगरसह, जालना आणि परभणी या 3 जिल्ह्यांना हवामान विभागाने 'यलो अलर्ट' जारी केला आहे.

छत्रपती संभाजीनगरसह जालना आणि परभणी या जिल्ह्यांत पुढील 24 तासांत पावसाचा जोर अधिक राहणार आहे. या काळात येथे विजांच्या कडकडाट आणि वादळी वाऱ्यासह मुसळदार पावसाची शक्यता आहे. या काळात ताशी 30-40 किमी वेगाने वारे वाहतील. तर काही ठिकाणी हलका ते मध्यम पाऊस होऊ शकतो.

बीड, लातूर जिल्ह्यात हलका ते मध्यम स्वरूपाचा पावसाची शक्यता आहे. तसेच हिंगोली आणि नांदेडमध्ये मध्यम पाऊस असणार आहे, तर धाराशिव जिल्ह्यात हलका पाऊस राहणार असल्याचा अंदाज वर्तविण्यात आला आहे. या 5 जिल्ह्यांत सामान्यतः ढगाळ वातावरण राहणार आहे. त्यामुळे शेतकऱ्यांनी कामाचे योग्य ते नियोजन करावे, असे आवाहन हवामान विभागाने केले आहे.

छत्रपती संभाजीनगर जिल्ह्यात 29 ऑगस्टच्या सकाळपर्यंत 29.9 मि.मी. पावसाची नोंद झाली. चार तालुक्यांतील चार मंडळांत अतिवृष्टीची नोंद झाली आहे. यात सर्वाधिक पाऊस गंगापूर तालुक्यातील शेंदूरवादा मंडळात झाला आहे. या पावसामुळे ग्रामस्थांची तारांबळ उडाली.