छत्रपती शिवाजी महाराज यांच्या राज्यभिषेकाची खास सोन्याची 'होन' नाणी, पाहा दुर्मिळ Photos

छत्रपती शिवाजी महाराज यांच्या राज्यभिषेकाच्या वेळी खास सोन्याची 'होन' नाणी तयार करण्यात आली होती. छत्रपती शिवाजी महाराज यांची ही 'होन' नाणी अतिशय दुर्मिळ असून आतापर्यंत केवळ 5 ते 6 होन उपलब्ध झाली आहेत.

छत्रपती शिवाजी महाराजांच्या काळात शिवराई आणि होन या दोन नाण्यांना मोठं महत्त्व आहे. शिवराई हे तांब्यापासून तयार केलं जात होतं. तर सोन्यापासून होन चलन तयार केलं जात होतं.

छत्रपती शिवाजी महाराज यांची 'होन' नाणी दुर्मिळ आहेत. त्यापैकी 3 सुवर्ण होन नागपुरातील नाणी संग्राहक अशोक सिंह ठाकूर यांचेकडे आहेत. या नाण्यावर एका बाजूला 'श्री राजा शिव' तर दुसऱ्या बाजूला 'छत्रपती' असा मजकूर लिहिला आहे.

सुमारे 3 ग्राम वजनाच्या या होन नाण्यांचा व्यास 1.2 सेंटीमीटर एवढा आहे. छत्रपती शिवाजी महाराज यांच्या राज्याभिषेकाच्या एक दिवसअगोदर सुवर्ण होन तुला करण्यात आली होती.

रायगडावर झालेल्या भव्यदिव्य राज्याभिषेकाला आलेल्या अनेक गणमान्य व्यक्ती, सरदार, मंत्री यांना हे सुवर्ण होन शिवाजी महाराजांनी स्वतः आपल्या हाताने दान केलं होतं.

त्यामुळे या सुवर्ण होनला छत्रपती शिवाजी महाराज यांच्या हातांचा स्पर्श झाल्याचं नाणी संग्राहक अशोक सिंह ठाकूर सांगतात. त्यामुळे ही नाणी खास आहेत, असंही ते सांगतात.