Ambezari village : अचानक 15 ते 20 हत्ती अख्ख्या गावावर चालून आले; जीव वाचला पण संसार गेला, पाहा PHOTOS

गडचिरोली जिल्ह्यातील कुरखेडा तालुक्यात मागील काही दिवसांपासून मुक्कामी असलेल्या रानटी हत्तीचा कळपाने अचानक आंबेझरी गावावर हल्ला चढवला.

येथील 14 घरांची मोठ्या प्रमाणात नासधूस केली. घरातील अन्न धान्य जिवनाआवश्यक वस्तूंसह साहित्याचीही मोडतोड केल्याने एन पावसाळ्यात या कुटुंबांचा संसार उघड्यावर पडला आहे.

आंधळी(सोनपूर) गट ग्रामपंचायत अंतर्गत फक्त 36 कुटुंब असलेला आंबेझरी डोंगर व घनदाट जंगलाने वेढलेला हा 100 टक्के आदिवासी कुटुंब असलेला छोटासा गाव गावकरी निसर्गाचा सानिध्यात भात शेती व इतर गोष्टींवर आपला उदर निर्वाह करतात.

आज अचानक 18 ते 20 च्या संख्येत असलेल्या रानटी हत्तींचा कळपाने गावावर हल्ला चढवला आणि घरांची नासधूस करण्यास सुरुवात केली.

अचानक झालेल्या या हल्ल्याने घाबरलेल्या गावकऱ्यांनी मुलाबाळांसह घरातून पळ काढला.

काही वेळानंतर स्वतःला सावरत व बळ एकवटत गावकऱ्यांनी काठ्या हातात घेऊन ठेंभे पेटवत हत्तीच्या कळपाला गावातून पिटाळून लावण्याचा प्रयत्न सुरू केला. मात्र, त्यांचा धूमाकूळ सुरूच होता.

सुदैवाने यावेळी कोणतीही जीवितहानी झाली नाही. मात्र, रानटी हत्तींनी घराची व घरातील साहीत्याची मोठी मोडतोड तसेच घरातील अन्न धान्याची मोठी नासाडी केली.

या घटनेत येथील गरीब कुटुंब निराधार झाले आहे. दुर्गम भागातील आदिवासी गरीब कुटुंब पावसाळ्यात 4 ते 6 महिन्यांचा अन्न धान्याचा साठा करून ठेवतात. मात्र, या हल्ल्यात त्यांचा हा साठाच नष्ट झाल्याने त्यांचा संसार उघड्यावर आला असून मोठं संकट निर्माण झाले आहे.

या शिवाय गावातील केळीचे झाडे तसेच गावालगत असलेल्या धान पीके ही पायदळी तूडवत मोठे नूकसान केले आहे.