Gadchiroli News : माओवाद्यांविरुद्ध जिवाची बाजी! गडचिरोलीतील 'त्या' 17 पोलिसांना राष्ट्रपती पदक जाहीर

माओवाद्यांचा बिमोड करण्यासाठी जीवाची बाजी लावताना अतुलनीय शौर्य दाखवणाऱ्या गडचिरोली पोलीस दलातील 17 अधिकारी कर्मचाऱ्यांना राष्ट्रपतींचे पोलीस शौर्य पदक जाहीर झाले आहेत.

तर एका पोलीस अधिकाऱ्याला गुणवत्तापूर्ण सेवेसाठी पदक जाहीर झाले आहे. दरवर्षी स्वातंत्र्य दिनाच्या पूर्वसंध्येला दहशतवादी आणि माओवाद्यांचे विरोधात अतुलनीय कामगिरी करणाऱ्यांना राष्ट्रपतींकडून पोलीस शौर्य पदक जाहीर केलं जातं.

यावर्षी देशात 208 पोलीस शौर्य पदक आणि 624 गुणोत्तर पूर्ण सेवेसाठी पदक जाहीर झाले आहेत. त्यात देशातल्या सगळ्या राज्यांमधून महाराष्ट्राला आणि त्यातही गडचिरोली जिल्ह्याला सर्वाधिक 17 पोलीस शौर्यपदक जाहीर झाले आहेत.

गडचिरोलीत असताना माओवाद्यांचे विरोधात अतुलनीय कामगिरी केल्याबद्दल तत्कालीन अतिरिक्त अधीक्षक असलेले आणि सध्या वाशीम येथे पोलीस अधीक्षक असलेले अनुज तारे यांच्यासह भामरागडचे तत्कालीन उपविभागीय पोलीस अधिकारी डॉक्टर कुणाल सोनवणे यांच्यासह चार पोलीस उपनिरीक्षक यांनाही पोलीस शौर्य पदक जाहीर झाले आहेत.

तसेच गडचिरोली पोलीस दलाच्या 11 पोलीस हवालदारांनाही हे पोलीस शौर्यपदक जाहीर झाले आहेत. माओवाद्यांच्या हल्ल्यात लढत असताना शहीद झालेले पोलीस उपनिरीक्षक धनाजी वनमाने यांनाही मरणोत्तर पोलीस शौर्यपदक जाहीर झाले आहे. तर पोलीस उपनिरीक्षक मधुकर नेताम यांना राष्ट्रपती यांचे गुणवत्तापूर्ण सेवेसाठी पदक जाहीर झाले आहे.