Mumbai Pune Expressway: बोर घाटात पुन्हा कारला आग, बोगद्याजवळ डस्टर गाडी जळून खाक

खंडाळा बोर घाट परिसरात वाहनांना आग लागण्याच्या घटना सुरूच असून आज पुन्हा एकदा खंडाळा बोगद्याजवळ डस्टर कारला अचानक आग लागल्याची घटना घडली.

या आगीत गाडी काही मिनिटांतच जळून खाक झाली. मिळालेल्या माहितीनुसार, बोर घाटातून जात असताना डस्टर कारमधून अचानक धूर निघू लागला.

चालकाने प्रसंगावधान राखत तात्काळ गाडी रस्त्याच्या कडेला थांबवून बाहेर पडल्याने मोठी जीवितहानी टळली.

मात्र काही क्षणांतच आगीने भीषण रूप धारण करत संपूर्ण गाडी भस्मसात झाली. घटनेची माहिती मिळताच अग्निशामक दल आणि पोलिसांनी घटनास्थळी धाव घेत आग आटोक्यात आणली.

या घटनेमुळे काही काळ बोर घाटातील वाहतूक मंदावली होती. सुदैवाने या घटनेत कोणतीही जीवितहानी झाली नसून आगीचे नेमके कारण अद्याप स्पष्ट झालेले नाही. संबंधित यंत्रणा पुढील तपास करत आहेत.