Vidarbha Weather: विदर्भात हवामानाची विचित्र स्थिती, पुन्हा आस्मानी संकट, 3 जिल्ह्यांना अलर्ट

एप्रिल महिन्यात राज्यातील बहुतांश भागात सूर्य आग ओकत असल्याचे चित्र आहे. विदर्भात उन्हाचा तडाखा वाढला असून तापमान 44 अंश सेल्सिअस वर गेलंय. नागपूर, अमरावती आणि अकोला या प्रमुख शहरांत उष्णतेचा पारा 44 अंशांच्या घरात असल्याने लोक हैराण आहेत.

विदर्भात आज हवामानात काहीसे बदल जाणवण्याची शक्यता आहे. उन्हाची तीव्रता कायम असतानाचा वातावरण अंशत: ढगाळ राहील. तसेच 3 जिल्ह्यांत वादळी पावसाचा इशारा हवामान विभागाने दिला आहे.

चंद्रपूर जिल्ह्यात कमाल तापमान 43 अंशांवर पोहोचले असून, येथे वादळी वाऱ्यांसह पावसाची शक्यता वर्तवण्यात आली आहे. त्याचबरोबर गडचिरोली आणि यवतमाळ जिल्ह्यांमध्येही वादळी वारे आणि पावसाची शक्यता आहे.

नागपूर, अमरावती आणि अकोला या तिन्ही शहरातील कमाल तापमान 44 अंश सेल्सिअस इतके असणार आहे. तर किमान तापमान 25 ते 26 अंश सेल्सिअसपर्यंत राहण्याची शक्यता आहे. त्याचबरोबर या सर्वच ठिकाणी अंशतः ढगाळ वातावरण राहणार असल्याची माहिती हवामान विभागानं दिली आहे.

वर्धा, गोंदिया आणि चंद्रपूर या जिल्ह्यांतील कमाल तापमान 42 ते 43 अंश सेल्सिअस इतके असण्याची शक्यता आहे. तर किमान तापमान 24 ते 26 अंश सेल्सिअस दरम्यान असू शकतं.

बुलढाण्यातील कमाल तापमान 39 अंश सेल्सिअस तर किमान तापमान 26 अंश सेल्सिअस इतके असण्याची शक्यता आहे. त्याठिकाणी मुख्यतः निरभ्र आकाश राहील.

विदर्भात तापमान वाढीबरोबरच अवकाळी संकट सुद्धा आहे. त्यामुळे नागरिकांनी सतर्कता बाळगणे गरजेचे आहे. दुपारच्या वेळी बाहेर पडणे टाळावे. त्याचबरोबर भरपूर पाणी प्यावे आणि आरोग्याच्या समस्यांकडे त्वरित लक्ष द्यावे, असे आवाहन आरोग्य विभागाकडून करण्यात आले आहे.