Samruddhi Mahamarg: समृद्धी महामार्गावर अमोनियम नायट्रेटचा टँकर लीक, प्रशासनाची धावपळ

जालना जिल्ह्यातील गुंडेवाडी शिवारातील समृद्धी महामार्गावर अमोनियम नायट्रेटने भरलेला एक टँकर लीक झाल्याची घटना घडली आहे. याची माहिती मिळताच प्रशासनाने तात्काळ पावले उचलत संबंधित मार्गावरील वाहतूक बंद केली.

संभाव्य स्फोटाचा धोका लक्षात घेऊन संपूर्ण परिसर सील करण्यात आला आणि वाहनांना सुरक्षित अंतरावरून वळवण्यात आले.

पोलिस अधीक्षक, जिल्हाधिकारी तसेच अग्निशमन दलाच्या पथकांनी घटनास्थळी धाव घेत परिस्थिती नियंत्रणात आणण्याचे प्रयत्न केले.

तज्ज्ञांच्या मदतीने अग्निशमन दलाकडून टँकरमधील गळती थांबवण्याचे काम युद्धपातळीवर करण्यात आले. दरम्यान टँकरला सुरक्षित ठिकाणी हलवून बाजूला उभा करण्यात आला आहे.

टँकरमधील रसायन दुसऱ्या टँकरमध्ये हलवण्याची प्रक्रिया रात्री पार पडणार असल्याची माहिती प्रशासनाकडून देण्यात आली आहे.

ही घटना काल सायंकाळी चार वाजताच्या सुमारास घडली होती. त्यानंतर जवळपास 24 तासांहून अधिक काळ प्रशासनाकडून कारवाई सुरू होती आणि आज सायंकाळी सहा वाजेपर्यंत परिस्थिती नियंत्रणात आणली आहे

24 तासानंतर टँकर मोकळ्या जागेवर हलवण्यात आला असून मोठा अनर्थ टळला आहे.